नवी दिल्ली : राफेल फायटर विमानांचा करार झाल्यापासून राफेल भारतात कधी दाखल होणार याची उत्सुकता सर्वांनाच लागली आहे. अशात राफेल या महिन्याच्या शेवटी-शेवटी म्हणजे २९ किंवा ३० जुलै रोजी भारतात दाखल होण्याची शक्यता वर्तविण्यात येत आहे. हरयाणातील अंबाला एअर फोर्स स्टेशनवर ही राफेल फायटर विमाने तैनात करण्यात येतील.

ताज्या बातम्यासाठी डाऊनलोड करा ई-सकाळचे अॅप

पुण्याच्या बातम्या वाचण्यासाठी येथे क्लिक करा

युद्धात गेम चेंजर ठरु शकणाऱ्या या विमानांचा अंबाल एअर बेसवर मुख्य तळ असणार आहे. सर्व काही नियोजनानुसार झाले, तर २० ऑगस्टला पारंपारिक पद्धतीने सोहळा आयोजित करुन या फायटर विमानांचा भारतीय हवाई दलात समावेश करण्यात येणार असल्याची माहिती सूत्रांनी दिली आहे. भारताने फ्रान्सबरोबर अशी ३६ राफेल विमाने खरेदी करण्याचा करार केला आहे. पूर्णपणे अत्याधुनिक शस्त्रास्त्रांनी सुसज्ज विमाने फ्रान्सकडून भारताला देण्यात येतील. भारतात दाखल झाल्यानंतर लवकरात लवकर या विमानांचा वापर करण्यावर लक्ष केंद्रीत करण्यात येणार असल्याचे सांगण्यात येत आहे. आएएफच्या एअर क्रू आणि ग्राऊंड क्रू टीमला हे विमान कसे हाताळायचे, त्याबद्दल व्यापक असे प्रशिक्षण देण्यात आले आहे. 

भारतीय सैन्याला मोठा फायदा
भारतीय सैन्याच्या ताफ्यात राफेल दाखल झाल्यानंतर त्यांना मोठ्या प्रमाणावर फायदा होणार असून त्यांची ताकद वाढेल. सध्या चीन आणि पाकिस्तानकडे राफेलच्या तोडीचे एकही विमान नाही. भारताला मिळणारी राफेल फायटर विमाने मिटिओर आणि स्काल्प अशा मिसाइल्सनी सुसज्ज असतील. यामुळे शत्रुच्या प्रदेशात खोलवर अचूक हल्ला करण्याची भारतीय हवाई दलाची क्षमता कैकपटीने वाढणार आहे तसेच हवाई वर्चस्व सुद्धा प्रस्थापित करता येईल.