कोलकता : दिवंगत राष्ट्रपती प्रणव मुखर्जी (Former President Pranab Mukherjee) यांचे पुत्र अभिजित (Abhijit Mukherjee) यांनी सोमवारी काँग्रेसला (Congress) सोडचिठ्ठी देऊन पश्चिम बंगालमधील सत्ताधारी तृणमूल काँग्रेसमध्ये (Trinamool Congress) प्रवेश केला. अभिजित यांनी पत्रकार परिषद घेतली. पश्चिम बंगालच्या मुख्यमंत्री ममता बॅनर्जी राष्ट्रीय राजकारणात आणखी मोठी भूमिका बजावू शकतील असे त्यांनी सूचित केले. ते म्हणाले की, ममता यांनी अलीकडेच भाजपची जातीयवादी लाट ज्या पद्धतीने थोपविली ते पाहता इतरांच्या मदतीने संपूर्ण देशात तसे करणे त्यांना शक्य होईल. (Former President Pranab Mukherjee son Abhijit Mukherjee joins Trinamool Congress)

काँग्रेस सोडण्याच्या निर्णयाबद्दल ते म्हणाले की, प्रमुख सदस्यत्व सोडले तर मला पक्षाच्या कोणत्याही समितीत किंवा पदावर घेण्यात आले नाही. त्यामुळे एक सैनिक म्हणून तृणमूलमध्ये दाखल होण्याचा निर्णय मी घेतला. तृणमूलच्या सूचनांनुसार मी कार्य करेन. एकात्मता आणि धर्मनिरपेक्षता कायम राखण्यासाठी मी झटेन. काही महिन्यांपूर्वी जितीन प्रसाद यांनी काँग्रेस सोडून भाजपमध्ये प्रवेश केला. अभिजित यांचे त्यांच्याशी घनिष्ठ संबंध आहेत. ते काँग्रेस संसदीय पक्षात सहकारी होते. दिवंगत प्रणव मुखर्जी यांचे जितीन तसेच त्यांचे पिता जितेंद्र प्रसाद यांच्याशी आपुलकीचे संबंध होते. अभिजित यांनी पित्याच्या जांगीपूर मतदारसंघातून दोन वेळा खासदारकीची निवडणूक जिंकली. मागील निवडणुकीत मात्र त्यांचा पराभव झाला. दोन आठवड्यांपूर्वी त्यांनी तृणमूलमधील दुसऱ्या क्रमांकाचे नेते अशी ओळख असलेले नेते आणि ममता बॅनर्जी यांचे भाचे अभिषेक बॅनर्जी यांची भेट घेतली होती. आपल्याला काय वाव असेल याविषयी त्यांनी चर्चा केली होती.

काँग्रेसला आणखी एक हादरा

अभिजित मुखर्जी यांनी पक्ष सोडल्यामुळे काँग्रेसला आणखी एक हादरा बसला आहे. गेल्या काही वर्षांत ज्योतिरादित्य शिंदे, जितीन प्रसाद, हिमंता बिस्व सरमा अशा काही प्रमुख नेत्यांनी काँग्रेसला सोडचिठ्ठी दिली आहे. त्यांच्या तुलनेत अभिजित यांचा ताकदवान नेते असा लौकिक नसला तरी पश्चिम बंगाल काँग्रेसची स्थिती आणखी कमकुवत झाली आहे. अलीकडेच झालेल्या विधानसभा निवडणुकीत काँग्रेसला एकही जागा जिंकता आली नाही. इतिहासात प्रथमच त्यांच्यावर भोपळा मिळण्याची नामुष्की आली.