बंगळूर : राज्यातील कॉंग्रेस-धर्मनिरपेक्ष जनता दल सरकार वाचविण्यासाठी कॉंग्रेसने काही योजना हाती घेतल्या आहेत. काही असंतुष्ट आमदारांना मंत्रिपद देण्याची ग्वाही देण्यात आली असल्याचे समजते. त्यासाठी चौघा पक्षनिष्ठ व वरिष्ठ कॉंग्रेस मंत्र्यांना राहुल गांधी यांनी मंत्रिपदाचा राजीनामा देण्याची सूचना केली आहे. 

कॉंग्रेसचे अध्यक्ष राहुल गांधी कर्नाटकातील राजकीय घडामोडींवर लक्ष ठेवून आहेत. राज्य कॉंग्रेसचे प्रभारी के. सी. वेणुगोपाल यांच्याकडून त्यांनी सविस्तर माहिती घेतली. माजी पंतप्रधान एच. डी. देवेगौडा यांच्याशीही त्यांनी मंगळवारी (ता. 15) सायंकाळी सविस्तर चर्चा केली. कोणत्याही परिस्थितीत सरकार वाचविण्याची गरज असल्याचे वेणुगोपाल यांना बजावून असंतुष्ट आमदारांशी चर्चा करण्याची राहुल गांधी यांनी सूचना केली होती.

विद्यमान चार मंत्र्यांनी औदार्य दाखवून राजीनामा द्यावा व असंतुष्ट आमदारांची त्या जागी वर्णी लावण्यास त्यांनी सुचविले असल्याचे समजते. हगरीबोम्मनहळ्ळीचे भीमा नायक, मस्कीचे प्रतापगौड पाटील, बळ्ळारी ग्रामीणचे नागेंद्र, मूळबागीलूचे एच. नागेश यांचा मंत्रिमंडळात समावेश करण्याचे नियोजन आहे. 

राजीनाम्याची तयारी असलेले मंत्री 

सरकार वाचविण्यासाठी मंत्रिपदाचा त्याग करण्याची तयारी चार वरिष्ठ मंत्र्यांनी दाखविली आहे. त्यामध्ये के. जे. जॉर्ज, डी. के. शिवकुमार, कृष्ण बैरेगौडा, प्रियांक खर्गे यांचा समावेश आहे.