नवी दिल्ली : केंद्र सरकारने दिवाळीच्या तोंडावरच पेट्रोल-डिझेलचे दर कमी केल्यानंतर हा सरकारचा राजकीय निर्णय असल्याची टीका विरोधीपक्षांकडून केली जात आहे. त्यातच राष्ट्रीय जनता दलाचे सर्वोसर्वा लालू प्रसाद यादव यांनी देखील केंद्रावर निशाणा साधला. उत्तर प्रदेशच्या निवडणुका झाल्यानंतर इंधनाच्या किंमती पुन्हा वाढतील असंही त्यांनी म्हटलं आहे.

इंधनाचे दर कमी करण्याचा केंद्राचा निर्णय हा तात्पुरता असून पुढील वर्षी उत्तर प्रदेशच्या विधानसभा निवडणुका पार पडल्यानतंर पुन्हा इंधनाचे दर वाढतील, असं लालू प्रसाद यादव यांनी म्हटलं आहे. ५ रुपयांनी पेट्रोल स्वस्त करत मोदी सरकार नाटक करत आहे. जर पेट्रोलच्या किंमती ५० रुपयांनी कमी झाल्या असत्या तर तो जनतेसाठी दिलासा झाला असता, असंही ते म्हणाले.

केंद्र सरकारनं बुधवारी उत्पादन शुल्कात कपात करत पेट्रोल ५ रुपयांनी तर डिझेल १० रुपयांनी स्वस्त केलं. तसेच राज्यांनाही व्हॅट कमी करण्याचं आवाहन केलं. त्यानंतर देशातील ९ भाजपशासित राज्यांनी तसेच ओडिशा सरकारनं व्हॅटमध्ये कपात केली.

दरम्यान, केंद्राच्या या निर्णयानंतर राजदचे नेते आणि बिहारचे माजी उपमुख्यमंत्री तेजस्वी यादव यांनीही यावर भाष्य केलं. पेट्रोलचे दर ७० रुपये प्रतिलिटरपेक्षा कमी व्हायला हवेत अशी मागणी त्यांनी केली. कारण सत्तेत येणाऱ्यापूर्वी भाजपनं पेट्रोल ७० रुपये प्रतिलिटर असताना ते खूपच महाग असल्याचं म्हटलं होतं आणि आता सत्तेत आल्यानंतर त्यांनीच पेट्रोल १०० रुपयांपार नेलं आहे. त्यामुळं पेट्रोलचे दर ७० रुपयांच्याखाली असावेत असं तेजस्वी यादव म्हणाले.