पणजी : कोरोना महामारीचा (corona pandemic) कहर रोखण्यात गोव्यातील भाजप (Goa BJP Government) सरकारला अपयश आलं आहे. लोकांना वेळेवर उपचार मिळत नसल्याचा आरोप करत आम आदमी पक्षानं (AAP) नागरिकांच्या मदतीसाठी पुढाकार घेतला आहे. त्यांना घरीच वैद्यकीय सल्ला मिळावा म्हणून आपनं हेल्पलाइनही सुरू केली आहे. (Goa BJP government fails to stop Corona AAP started helpline)

'आम आदमी पार्टी'नं पुढे येत कोरोना रुग्णांबरोबर सामान्य नागरिकांच्या मदतीसाठी हे पाऊल टाकलं आहे. याद्वारे कोरोनासंबंधी वैद्यकीय सल्ला दूरध्वनीद्वारे दिला जाणार आहे. त्यासाठी या पक्षाने एक नंबर जाहीर केला आहे. 7504750475 या हेल्पलाइनवर कोरोनाबाधित वा त्याच्या‌ नातेवाइकांना कॉल करता येईल, असं आपनं निवेदनात म्हटलं आहे.

हेल्पलाइनला संपर्क केल्यानंतर रुग्णाला होणारा त्रास आणि संबंधित लक्षणांच्या आधारे डॉक्टर त्याला वैद्यकीय सल्ला देतील. त्यामुळे रुग्ण गंभीर आजारापासून बचाव करू शकेल. कोरोनाचा संसर्ग झालेले रुग्ण, लक्षणं असलेल्या व्यक्ती आणि गृहविलगीकरणातील व्यक्ती यांच्यासाठी ही हेल्पलाइन सुरू करण्यात आली आहे.

गोवा 'बेहाल'

गोव्यात कोरोनामुळे परिस्थितीत वाईट झाली आहेत. गेल्या सात दिवसांत सरकाराच्या हलगर्जीपणामुळे ७५ जणांचा मृत्यू झाला आहे. अशी स्थिती असूनही गोवा सरकार रुग्णांवर उपचार करण्यास असमर्थ ठरत आहे. रुग्णालयात योग्य उपचार मिळत नसल्याने अनेक रुग्णांना त्यांचे‌ प्राण गमवावे लागत असल्याची‌ टीकाही निवेदनात करण्यात आली आहे.

आपची मदत सुरू

कोरोना संबंधी वैद्यकीय सल्ला देण्यासाठी हेल्पलाइन सुरु करण्याबरोबरच नागरिकांना ऑक्सिमीटर आणि खाद्य पदार्थांचे वितरण केले जात आहे. तसेच रुग्णांना औषधे दिली जात असून सरकारकडून उपचार मिळाला नाही, अशा रुग्णांना डॉक्टरसह वैद्यकीय सुविधा दिला जात असल्याचा दावा या पक्षानं केला आहे.