नवी दिल्ली : देशातील महागाईवरील प्रश्नावर सोमवारी लोकसभेत चर्चा झाली. यावेळी चर्चेला उत्तर देताना अर्थमंत्री सीतारामण यांनी देशाची आर्थिक स्थिती चांगली असल्याचं सांगितलं. या उत्तरावर आता काँग्रेसनं पलटवार केला आहे. सरकारचा अॅटिट्यूड म्हणजे देशात महागाई नाहीच, असा असल्याचं काँग्रेस नेते मनीष तिवारी यांनी म्हटलं आहे. (govt attitude is no inflation in country Congress criticizes Sitharaman answer on inflation)

तिवारी म्हणाले, "अर्थमंत्र्यांचं उत्तर हे निराशाजनक होतं. त्यांच्या बोलण्यातून सरकारचा अॅटिट्यूड देशात महागाई नाहीच, लोकांना महागाईचा त्रास होत नाहीए. सर्वकाही व्यवस्थित, छान चाललंय असा होता. जर देशातील १४० कोटी जनतेचा आवाज उठवणाऱ्या विरोधकांना जर तुम्ही उत्तर देत असाल तर आता काय बोलायच?"

दरम्यान, लोकसभेत आज महागाईवर चर्चा पार पडली. यावेळी विरोधकांनी महागाई संदर्भात अनेक मुद्दे मांडले. विरोधकांच्या या मुद्द्यांना नंतर अर्थमंत्री निर्मला सीतारामण यांनी संध्याकाळी ७ वाजता उत्तर दिलं. या उत्तरात त्यांनी देशात महागाई नाही उलट आपली अर्थव्यवस्था मजबूत होत असल्याचं म्हटलं. त्यामुळं देशात आर्थिक मंदीची शून्य शक्यता असल्याचंही त्यांनी सांगितलं. तसेच विरोधकांनी महागाईवरील चर्चेदरम्यान यावरील राजकीय मुद्देच जास्त प्रमाणात उपस्थित केले, प्रत्यक्ष आकडेवारीवर बोललेच नाहीत, असंही सीतारामण म्हणाल्या.