गुवाहाटी : गुजरातमधील आमदार जिग्नेश मेवाणी यांच्या अडचणी कमी होताना दिसत नाहीयेत. मंगळवारी आसाममधील बारपेटा जिल्ह्यातील स्थानिक न्यायालयाने महिला पोलिस कर्मचाऱ्याच्या विनयभंगप्रकरणी मेवाणी यांना पाच दिवसांची पोलिस कोठडी सुनावली.

दरम्यान या प्रकरणात मेवाणी यांच्यावर आयपीसी कलम २९४ (सार्वजनिक ठिकाणी अश्लील शब्द उच्चारणे), ३२३ (स्वैच्छिकपणे दुखापत करणे), ३५३ (कर्तव्य पार पाडताना सार्वजनिक सेवकावर हल्ला करणे) आणि ३५४ (तिच्या विनयभंगाच्या उद्देशाने महिलेवर फौजदारी बळाचा वापर करणे) अंतर्गत गुन्हा दाखल करण्यात आला आहे.

मेवाणी यांच्या वकिलांनी ते उद्या बारपेटा येथील उच्च न्यायालयात जामीन याचिका दाखल करणार असल्याचे सांगितेल. तसेच आम्ही, आश्चर्यचकित झालो आहोत. तीन दिवस पोलिस कोठडीत असताना अधिकार्‍यांवर झालेल्या हल्ल्याबद्दल कोणतीही चर्चा झाली नाही. त्यांना जामीन मिळाल्यानंतर अचानक पुन्हा अटक करण्यात आले आहे, असे मेवाणींचे वकील म्हणाले

पंतप्रधान नरेंद्र मोदी यांच्या विरोधात ट्विट केल्याप्रकरणी सोमवारी जामीन मिळालेल्या दलित नेत्याला दुसऱ्या प्रकरणात लगेचच अटक करण्यात आली होती. त्यांच्यावर भाजप, आरएसएस आणि पंतप्रधान मोदींविरोधात वादग्रस्त आणि निंदनीय वक्तव्य केल्याचा आरोप आहे. पंतप्रधान मोदींच्या गुजरात दौऱ्यापूर्वीही मेवाणी यांनी काही वादग्रस्त ट्विट केले होते, ज्याची पोलिसांनी दखल घेतली आहे. पंतप्रधान नरेंद्र मोदी यांच्यावर केलेल्या ट्विटवरून आसाम भाजपच्या एका नेत्याने त्यांच्याविरोधात तक्रार दाखल केल्यानंतर मेवाणी यांना गुरुवारी गुजरातच्या पालनपूर येथून अटक करण्यात आली होती.