आंध्र प्रदेश : येथील गुंटूर जिल्ह्यात धक्कादायक घटना घडली होती. तेलगू देसम पक्षाच्या (Telugu Desam Party) एका बड्या नेत्याची अज्ञात हल्लेखोरांनी हत्या केली होती. गुरुवारी आंध्रप्रदेशच्या गुंटूर जिल्ह्यात गुंडलापाडू येथे ही घटना घडली होती. थोटा चंद्रैया (Thota Chandraiah murder) असं हत्या झालेल्या नेत्याचं नाव आहे. या प्रकरणी गुंटूर ग्रामीण पोलीसांनी धडक कारवाई करत आठ जणांना (eight culprit arrested) आज शुक्रवारी अटक केलीय. या हत्या प्रकरणात युवजन श्रमिक रायथू काँग्रेस पक्षाच्या कार्यकर्त्याचा हात होता. चिंथा शिवरामैया असं आरोपीचं नाव असून पोलिसांनी त्याला बेड्या ठोकल्या आहेत. असं वृत्त इंडिया टुडेनं दिलं आहे. (Guntur Police arrested eight culprits in Telugu Desam Party Thota Chandraiah murder case)

थोटा चंद्रैया यांची हत्या झाल्यानंतर माजी मुख्यमंत्री चंद्राबाबू नायडू यांनी या घटनेचा तीव्र निषेध व्यक्त केला होता. चंद्रैया यांच्या अंत्यसंस्कारातही नायडू यांनी उपस्थिती दर्शवत शोक व्यक्त केला. दरम्यान, या प्रकरणाची पोलिसांनी तातडीनं दखल घेत आरोपींना गजाआड करण्यासाठी त्यांनी चार विशेष पथकं तयार केली. तेलगू देसमचे चंद्रैया आणि युवजन श्रमिक रायथू कांग्रेस पक्षाचा कार्यकर्ता चिंथा शिवरामैया यांच्यात रस्त्याच्या बांधकामावरुन वाद होता. अशी माहिती पोलीस तपासात समोर आलीय.

चिंथा शिवरामैया यांची हत्या करण्याचा चंद्रैया यांचा कट असल्याची खबर चिंथाला त्याच्या नातेवाईकांनी दिली होती. " 13 जानेवारीला थोटा चंद्रैया यांना आरोपींनी त्यांच्या गावात पाहिलं. त्यानंतर हल्लेखोरांनी चंद्रैया यांच्यावर दगडाने, काठ्यांनी आणि चाकूने हल्ला करत त्यांची हत्या केली." अशी माहिती पोलीस अधिक्षक विशाल गुन्नी यांनी दिलीय.