फरीदाबाद : हरियाणाच्या (Haryana) फरीदाबाद जिल्ह्यात आज एक हृदयद्रावक घटना घडलीय. जिल्ह्यातील गोठडा मोहब्बताबाद (Gothda Mohbtabad) गावात तीन जणांच्या हत्येमुळं खळबळ उडाली असून रात्री घडलेल्या या घटनेनंतर संपूर्ण गावात तणावपूर्ण वातावरण आहे. दरम्यान, या हत्येनंतर पळ काढणाऱ्या आरोपीला पोलिसांनी अटक केलीय. ह्या हल्ल्यात राजन, सुमन आणि आयेशा यांचा मृत्यू झालाय, तर गगन हा जखमी असून त्याच्यावर उपचार सुरू आहेत.

मिळालेल्या माहितीनुसार, धौज पोलीस स्टेशन परिसरातील गोठडा मोहब्बताबाद गावात भाड्याने राहणाऱ्या एका पुरुष आणि दोन महिलांची गोळ्या घालून हत्या करण्यात आलीय. या गोळीबारात एक लहान मुलगाही जखमी झाला असून त्याला उपचारासाठी खासगी रुग्णालयात दाखल करण्यात आलेय.

पोलिसांनी दिलेल्या माहितीनुसार, ही घटना आज पहाटे 3 : 15 च्या सुमारास घडलीय. ज्यात दोन महिलांसह एका व्यक्तीला गोळी लागलीय. प्राथमिक तपासात चारित्र्याच्या संशयावरून ही हत्या झाल्याची माहिती समोर आली असून पोलिसांनी याला दुजोरा दिलाय. फॉरेन्सिक टीमनं घटनास्थळी पोहोचून सर्व पुरावे गोळा केले असून पोलिसांनी तिघांचे मृतदेह शवविच्छेदनासाठी सिव्हिल हॉस्पिटलमध्ये पाठवले आहेत. दरम्यान, पोलिसांनी नातेवाईकांचा जबाब नोंदवून तपास सुरू केलाय.