दिल्लीनंतर (Delhi) हरयाणा (Haryana) सरकारनेसुद्धा दारु पिणे आणि खरेदी-विक्रीचे वय कमी केलं आहे. याआधी हरयाणात हे वय २५ वर्षे होतं ते कमी करून २१ असं करण्यात आलं आहे. हरयाणा सरकारने बुधवारी त्यांच्या महसूल अधिनियमात सुधारणा केली. यानुसार राज्यात दारु पिण्याचं, खरेदी-विक्रीसाठी कायदेशीर वय २५ वर्षांवरून २१ वर्षे करण्याचा निर्णय़ घेतला.

हरयाणा महसूल (संशोधित) विधेयक,२०२१ राज्याच्या विधानसभेत मंजूर कऱण्यात आले. विधेयकात दिल्लीने नुकतंच वय कमी केल्याचा दाखला देण्यात आला आहे. त्यानुसारच हरयाणातही वय कमी करण्याचा निर्णय घेतला.

उपमुख्यमंत्री दुष्यंत चौटाला यांनी विधानसभेत हे विधेयक मांडलं. प्रस्ताव मांडताना त्यांनी म्हटलं की, सध्याच्या सामाजिक-आर्थिक परिस्थिती मोठा बदल झाला आहे. जेव्हा जुने नियम, तरतुदी बनवल्या होत्या तेव्हाची परिस्थिती वेगळी होती. लोक आता शिकले असून दारु पिण्यासंदर्भात ते जबाबदारीने योग्य असा निर्णय़ही घेऊ शकतात.

दरम्यान, कलम २९ नुसार २५ वर्षांपेक्षा कमी वयाच्या व्यक्तीने दारु खरेदी किंवा विक्री केल्यास त्याचा परवाना रद्द कऱण्याची तरतूद होती. याशिवाय इतर शिक्षेसह ५० हजार रुपयांचा दंडही होता. आता हीच शिक्षा २१ वर्षांखालील व्यक्तीने दारु प्यायल्यास किंवा खरेदी-विक्री केल्यास लागू असणार आहे.