भुवनेश्वर: भारतात कुठे ना कुठे छापेमारी होतच असते. या छापेमारीनंतर बहुतेकदा संपत्ती जप्त केली जाते. मात्र, एका छापेमारीनंतर इतकी संपत्ती जप्त करण्यात आली आहे की तुमच्या पायाखालची जमीन सरकेल. हा आतापर्यंतचा सर्वांत मोठा छापा असल्याचं मानलं जातंय. ओडिशातील दक्षता पथकानं भ्रष्टाचाराविरोधात ही मोठी कारवाई केली आहे.

या पथकानं एका सरकारी अधिकाऱ्याच्या घरावर छापा टाकला असून या अधिकाऱ्याच्या घरात तब्बल १.३६ कोटी रुपयांची रोकड रक्कम हाती लागली आहे. इतकंच नव्हे, तर या रकमेसोबतच कोट्यवधी रुपयांचे दागिने आणि इतर व्यवहारांशी संबंधित कागदपत्रंदेखील मिळाली असून छापा मारणाऱ्या अधिकाऱ्यांनी ती जप्त केली आहेत. इतकी बलाढ्य संपत्ती पाहून छापा टाकणारे अधिकारी देखील अंचबित झाले आहेत.

ओडीसामधील मलकानगरीमधील सरकारी अभियंता आशीष कुमार दासला गेल्या शुक्रवारी ताब्यात घेण्यात आलंय. हा व्यक्ती तेंव्हा डीसीबी बँकेच्या व्यवस्थापकाला १०.२३ लाख रुपये देण्यासाठी गेला होता. या प्रकरणी या अभियंत्याला ताब्यात घेतल्यानंतर दक्षता पथकानं त्याच्यावर लक्ष ठेवून अधित तपास सुरु केला. काही दिवसांनंतर त्याच्याशी संबंधित अनेक ठिकाणांवर छापे टाकण्यात आले. या छापेमारीमध्ये मोठ्या प्रमाणात रोख रक्कम, दागिने आणि अन्य मौल्यवान वस्तू मिळाल्या आहेत.

कारवाईत काय सापडलं?

• १.३६ कोटी रुपयांची रोकड

• १.२ किलो सोनं

• नातेवाईकांच्या नावे ऍक्सिस बँकेत १२ खाती

• त्यामध्ये जवळपास २.२५ कोटी रुपये

• एफडी, बचत खात्यांमध्ये ४ कोटी रुपये

• पत्नीच्या नावे फ्लॅट - किंमत ३२.३० लाख रुपये

• पत्नीच्या नावे केओन्जर जिल्ह्यातल्या बारिपाल येथे भूखंड