गुवाहाटी : शिवसेनेचे बंडखोर नेते एकनाथ शिंदे (Eknath Shinde) यांच्यासह ४० पेक्षा अधिक आमदार आसामच्या गुवाहाटी येथील रॅडिसन ब्लू हाॅटेलमध्ये थांबले आहेत. मात्र त्यासाठी कोण पैसे मोजत आहे? यावरुन सध्या चर्चेला उधाण आले आहे. आमदारांचा हाॅटेलमधील खर्च भाजप करत असल्याचा आरोप होत आहे. यावर आसामचे मुख्यमंत्री तथा भाजप नेते हिमंता बिस्वा सरमा (Himanta Biswa Sarma) यांनी स्पष्टीकरण दिले आहे. (Himanta Biswa Sarma Says, Neither BJP Nor Assam Paying Hotes Bills Of Shiv Sena MLAs)

भाजप (BJP) आणि आसाम (Assam) सरकारने महाराष्ट्रातील बंडखोर आमदारांचे हाॅटेलचे बिल देत नाही, असा दावा सरमा यांनी केला. तसेच त्यांनी महाराष्ट्रातील राजकीय संकटाशी संबंध नसल्याचे सांगितले. जर काही पाहुणे आसामला आले असतील, तर ती सुरक्षित आणि त्यांची गैरसोय होणार नाही ना याची मला काळजी असते. उद्या काँग्रेस येईल, त्यावेळीही मी अशाच पद्धतीने त्यांचे स्वागत करेल, असे सरमा म्हणाले. (Maharashtra Politics)

भाजप हाॅटेलचे बिल का देईल? किंवा आसाम का देईल? उलट आसामला हाॅटेलकडून जीएसटीतून उत्पन्न मिळते. मी शिवसेनेचे आभार मानतो. त्यांच्यामुळे आसाममधील पूराची चर्चा सुरु झाली, असे सरमा म्हणाले.