नवी दिल्ली : जेएनयूचा माजी विद्यार्थी नेता तसेच कम्युनिस्ट पार्टी ऑफ इंडियाचा सदस्य कन्हैया कुमार तसेच गुजरातचे अपक्ष आमदार जिग्नेश मेवानी यांनी आज काँग्रेससोबत जाण्याचा निर्णय घेतला आहे. गेल्या अनेक दिवसांपासून या दोघांची काँग्रेस प्रवेशाची चर्चा सुरु होती. "आम्ही या तरुण नेत्यांसोबत काम करण्यास उत्सुक आहोत, कुमार आणि मेवानी, या देशातील सत्ताधारी फॅसिस्ट शक्तींना पराभूत करण्यासाठी लढणार," असे मत काँग्रेसचे संघटना सरचिटणीस के. सी. वेणुगोपाल यांनी व्यक्त केले. मात्र जिग्नेश मेवाणी यांचा प्रवेश अधिकृत रित्या झाला नाहीये, याचं कारण त्यांनी स्वत:चं स्पष्ट केलंय.

यावेळी बोलताना जिग्नेश मेवाणी यांनी म्हटलंय की, काही तांत्रिक कारणांमुळे मी अधिकृतरित्या काँग्रेस पक्षामध्ये समाविष्ट होऊ शकत नाही. सध्या मी अपक्ष आमदार आहे. जर मी पक्षप्रवेश केला तर मी आमदार पदावर राहू शकत नाही. मात्र, मी काँग्रेसच्या विचारधारेसोबतच असेन. येत्या गुजरात विधानसभा निवडणुकीमध्ये काँग्रेस पक्षाच्या चिन्हासह निवडणूक लढवेन.

लोकशाही आणि 'आयडीया ऑफ इंडिया' या दोन्हीला वाचवण्यासाठी मी काँग्रेस पक्षासोबत आहेत. या पक्षाने स्वातंत्र्याची लढाई लढली आणि ब्रिटीशांना देशाबाहेर काढलंय, म्हणूनच मी पक्षासोबत आहे.

कन्हैया कुमारने म्हटलंय की, आमचं हे म्हणणं आहे की आज देशाला भगतसिंगांच्या वीरतेची गरज आहे. गांधींच्या एकतेची गरज आहे. आंबेडकरांच्या समानतेची गरज आहे आणि हाच विचार जपण्याची गरज आहे, म्हणून मी काँग्रेस पक्षात प्रवेश करत आहे. मला असं जाणवतंय की, या देशात काही लोक, विचारधारा या देशातील चिंतन परंपरा, संस्कृती, इतिहास, वर्तमान आणि भविष्य खराब करण्याचा प्रयत्न करत आहेत, त्या विचारधारेला तुम्ही आपोआपच ओळखून जाल. आम्ही आमचे विरोधक ओळखून आहेत. त्यामुळे आम्ही असा निर्णय केला की या देशातील सर्वांत मोठी लोकशाही पक्षामध्ये प्रवेश करायचा. हेच या देशातील अनेक तरुणांन वाटतंय.