नवी दिल्ली- नेहरुंची भाषणे मला खूप आवडायची असे म्हणत केंद्रीय मंत्री आणि भाजपाचे ज्येष्ठ नेते नितिन गडकरी यांनी देशाचे पहिले पंतप्रधान जवाहरलाल नेहरु यांच्या भाषणाचे आणि त्यातून मांडण्यात आलेल्या विचाराचे कौतुक केले आहे. नेहरुंचे भाषण आपल्याला फार आवडत होते, असे त्यांनी म्हटले आहे. एका कार्यक्रमात भाषणादरम्यान त्यांनी असे सांगितले आहे.

गडकरी म्हणाले की, जवाहरलाल नेहरु म्हणायचे भारत हा देश नाही, लोकसंख्या आहे. या देशाचा प्रत्येक व्यक्ती देशासाठी प्रश्न आहे, समस्या आहे. त्यांचं हे भाषण मला खूपच आवडतं. त्यांमुळे मी इतकं जरुर करु शकतो की, देशासमोर मी समस्या बनून राहणार नाही. सहिष्णुता भारताची सर्वांत मोठी देणं असून ही आपल्या व्यवस्थेचा एक मोठा भाग आहे. त्यामुळे एखाद्याने चुकीचं केलं तर आपणही त्याला तशीच प्रतिक्रिया द्यायची ही मानसिकता ठीक नाही. नेहरुंनी म्हटले होते की, भारत एक देश नाही तर लोकसंख्या आहे. जर आपण एखाद्या समस्येवर तोडगा काढू शकत नसू तर आपल्याला या समस्येचा भागही बनता कामा नये, असे म्हणत त्यांनी एकप्रकारे नेहरूंचे जाहीररित्या कौतुकच केले.

पुढे बोलताना ते म्हणाले की, निवडणुका जिंकणे चांगले आहे. मात्र, निवडणुक जिंकून जर तुम्ही लोकांच्या जीवनात बदल घडवता येत नसेल तर आपलं सत्तेत येण्याने आणि जाण्याने कोणताही फरक पडत नाही. माजी पंतप्रधान अटलबिहारी वाजपेयींची आठवण काढत ते म्हणाले, सरकारे येतील जातील मात्र, देश कायम राहणार. हा देश कोणत्याही पक्षाचा नाही तर 130 कोटी भारतीयांचा असल्याचेही गडकरींनी यावेळी सांगितले.