कोरोना विषाणुचा नवा व्हेरिअंट ओमिक्रॉनने (Omicron) सध्या जगाची चिंता वाढवली आहे. त्याच पार्श्वभूमिवर सध्या देशात कोरोना (Covid19) प्रतिबंधात्म नियमांचं पालन करणे आणि लसीकरणावर भर देण्याचं आवाहन केंद्र सरकारकडून देण्यात येत आहेत. त्याच पार्श्वभूमिवर सर्व जिल्हाधिकाऱ्यांना देखील लसीकरण (Vaccination) मोहिमेकडे लक्ष देण्याचे आदेश देण्यात आले आहेत. मात्र जिल्हाधिकाऱ्यांवर लसीकरणामुळे दबाव आला की काय? असा प्रश्न उपस्थित करणारी एक घटना मध्यप्रदेशमधूमन समोर आली आहे.

ग्वाल्हेरचे जिल्हाधिकारी कौशलेंद्र विक्रम सिंह यांचा एक व्हिडिओ सध्या सोशल मिडियावर प्रचंड व्हायरल होतो आहे. कौशलेंद्र विक्रम सिंह यांनी मंगळवारी बैठकीत अधिकारी आणि कर्मचाऱ्यांना कडक तंबी दिली आहे. तुम्ही काहीही करा अन् सर्वांचं लसीकरण करा...तुम्ही शेतात जा, लोकांचे पाय धरा, त्यांच्या घरी जाऊन 24 तास बसा, पण लसीकरणाचे उद्दिष्ट पूर्ण झालेच पाहिजे. एकाही माणसाचं लसीकरण राहिलं तर मी तुम्हाला फासावर चढवेन अशी धमकीच त्यांनी बोलण्याच्या ओघात कर्मचाऱ्यांना दिली आहे.

जिल्हाधिकाऱ्यांनी भितरवार तालुक्यात अधिकारी व कर्मचाऱ्यांची बैठक घेतली. या बैठकीत सादर करण्यात आलेल्या आकडेवारीनुसार कोविड-19 लसीकरणाचे लक्ष्य गाठले जात नसल्याचं समोर आलं. त्यामुळे संतप्त झालेल्या जिल्हाधिकाऱ्यांनी अधिकाऱ्यांना इशारा देत एकही माणूस सोडला तर थेट फाशी देईन, असं वक्तव्य केलं. हा व्हिडिओ सध्या सोशल मीडियावर प्रचंड व्हायरल होत आहे. दुसरीकडे, व्हिडिओ व्हायरल झाल्यानंतर डीएम म्हणाले की, सरकारी कर्मचाऱ्यांना या प्रकरणाचे गांभीर्य समजत नाही, त्यामुळे इशारा दिला. तसेच त्यांनी पुढे हे सुद्धा स्पष्ट केलं की, लसीकरणाचं उद्दिष्ट पूर्ण न केल्यास बडतर्फ व निलंबनाची कारवाई करण्यात येईल.