चिक्कोडी : मला शिक्षक मतदारसंघातून शिक्षकांनी सहा वर्षांसाठी निवडून दिले आहे. मला निवडणूक लढविण्यासाठी निवडलेले नाही. यापूर्वी मंत्री असताना लोकसभा निवडणूक (Loksabha Elections) लढविली होती. वारंवार मी निवडणूक लढविण्यासाठी काय मी फुटबॉल (Football) आहे का, असा सवाल करत आपण लोकसभा निवडणूक लढविणार नाही, अशी माहिती वायव्य शिक्षक मतदारसंघाचे विधान परिषद सदस्य प्रकाश हुक्केरी (Prakash Hukkeri) यांनी दिली.

केरूर येथे कार्यक्रमात पत्रकारांशी बोलताना त्यांनी आपली भूमिका स्पष्ट केली. ते म्हणाले, यापूर्वी मी अनेक निवडणुका लढविल्या आहेत. आता माझा कार्यकाळ सहा वर्षांचा असल्याने लोकसभा अथवा राज्यसभा निवडणूक लढविणार नाही. मुख्यमंत्री सिद्धरामय्या (CM Siddaramaiah) यांनी सांगितले तरी लोकसभा निवडणूक लढविणार नाही.

पक्षाकडून कितीही दबाव आला तरी मी निवडणूक (Chikkodi Loksabha Constituency) लढविणार नाही. याबाबत सिद्धरामय्या यांना मी यापूर्वीच सांगितले आहे. विधानपरिषद सदस्यपदाची निवडणूक बेळगावमधून लढविण्यासाठी उमेदवारी देण्यासाठी मागणी होती. त्यामुळे मी शिक्षक मतदारसंघातून निवडणूक लढवून विजयी झालो. आता निवडणुकीत उतरणार नाही. आपण कुठल्या उमेदवाराची शिफारस करणार का, या प्रश्नावर मी कुणाचीही शिफारस करणार नाही. पक्षश्रेष्ठी आपला निर्णय घेतील.

मी शिक्षक मतदारसंघात काम करत असून, तीन जिल्ह्यांत काम सुरू आहे. शिक्षकांच्या समस्या सोडवायच्या आहेत. त्यामुळे प्रभावी उमेदवार म्हणून मला उमेदवारी दिली तरी मी स्वीकारणार नाही. यापूर्वी मला अनेक निवडणुका लढविण्यास श्रेष्ठींनी सांगितल्यानंतर मी त्या लढविल्या आहेत. यावेळी मी कुठल्याही स्थितीत लोकसभा अथवा राज्यसभा निवडणूक लढविणार नाही. याबाबत मी मुख्यमंत्री सिद्धरामय्या यांनी स्पष्ट सांगणार आहे. निवडणूक न लढविण्याच्या माझ्या निर्णयावर ठाम आहे, असेही आमदार हुक्केरी म्हणाले.