ढाका : भारत आणि बांग्लादेशमध्ये गुरुवारी उच्चस्तरीय बैठक पार पडली आहे. भारताचे परराष्ट्र मंत्री डॉ. एस. जयशंकर यांनी गुरुवारी बांग्लादेशचे समकक्ष डॉ. ए.के. अब्दुल मोमेन यांची भेट घेत बांग्लादेशच्या पंतप्रधान शेखा हसिना यांच्याशी चर्चा केली आहे. दोन्ही देशांच्या मैत्री दौऱ्यातील बैठक ढाका झाली आहे. परराष्ट्र सचिव-नियुक्त विनय मोहन क्वात्रा हेसुद्धा या चर्चेदरम्यान उपस्थित असणार आहेत. युक्रेन युद्धाच्या पार्श्वभूमीवर दोन्ही देशांमध्ये इंधनाच्या वाढत्या भावामुळे परिणाम झाला असून संयुक्त राष्ट्रामध्ये झालेल्या बैठकीत दोन्ही देशांनी सावधपणे मतदान केलं होतं.

"बांग्लादेशच्या डॉ. ए.के. अब्दुल मोमेन यांच्यासोबत साकारात्मक चर्चा झाली. भारत आणि बांग्लादेशच्या संबंधातून सातत्याने प्रगती करण्यावर त्यांनी सहमती दर्शवली आहे. त्यासाठी दोन्ही देशांकतील भागीदारी पुढे नेण्यासाठी आमचा प्रयत्न असेल आणि त्यासाठी आम्ही चर्चा करायला तयार आहोत असं ते म्हणाले आहेत." असं परराष्ट्र मंत्री जयशंकर यांनी सांगितलं.

या भेटीदरम्यान जयशंकर यांनी पंतप्रधान मोदींचा संदेश बांग्लादेशच्या पंतप्रधान शेखा हसीना यांच्यापर्यंत पाठवला. तसेच युक्रेन युद्धाच्या पार्श्वभूमीवर आणि कोरोनाच्या निर्बंधामुळे दोन्ही देशांनी व्यापार, वाणिज्य आणि दळणवळणावर भर दिला असून भारताने कोरोनाच्या काळात बांग्लादेशला मदत केली असल्याची माहिती बांगलादेशच्या परराष्ट्र व्यवहार मंत्रालयाने एका निवेदनात दिली आहे.

दरम्यान या भेटीमध्ये न्यायबाह्य हत्येचा आरोप असलेल्या रॅपिड अॅक्शन बटालियन (RAB) वर संयुक्त राष्ट्रांनी लादलेले निर्बंध उठवण्यात मदत करण्याची मागणी भारताकडे केली होती. त्यानंतर हा मुद्दा मीडियामध्ये चर्चेच आला होता. त्यानंतर भारताच्या परराष्ट्र व्यवहार मंत्रालयाचे अधिकृत प्रवक्ते अरिंदम बागची यांनी कथित देवाणघेवाणीच्या तपशीलात जाण्यासाठी नकार दिला होता.

राष्ट्रपती राम नाथ कोविंद यांनी गेल्या डिसेंबरमध्ये विजय दिवस समारंभात ढाका येथे यजमानपद भूषवल्यानंतरची ही पहिलीच भेट आहे. उन्हाळ्याच्या शेवटच्या काही दिवसात बांग्लादेशच्या पंतप्रधान हसिना भारत दौऱ्यावर येण्याची शक्यता असल्याचे समजते. परराष्ट्रमंत्री श्री जयशंकर शुक्रवारी भूतानला रवाना होणार आहेत.