नवी दिल्ली: सीमेपलीकडून चीनने (china) कोणतीही आगळीक केल्यास त्यांना चोख प्रत्युत्तर देण्यासाठी भारताने पिनाका (pinaka) आणि स्मर्च (Smerch) मल्टीपल रॉकेट लाँचर सिस्टिम (MRLS) नियंत्रण रेषेजवळच्या फॉरवर्ड पोझिशन्सवर तैनात केली आहे. पिनाका रॉकेट सिस्टिम ३८ किलोमीटरपर्यंतच्या लक्ष्यावर प्रहार करु शकते. पिनाकाला सहा लाँचर्सची बॅटरी असून ४४ सेकंदात ७२ रॉकेट डागण्याची या सिस्टिमची क्षमता आहे.

पिनाका ही डीआरडीओने विकसित केलेली स्वदेशी बनावटीची मल्टीपल रॉकेट लाँचर सिस्टिम आहे. लेफ्टनंट कर्नल सारथ यांनी ही माहिती दिली. पिनाका आणि स्मर्च .या दोन्ही रॉकेट सिस्टिममुळे अत्यंत कमी वेळेत अचूकतेने शत्रूच्या लक्ष्यावर प्रहार करता येऊ शकतो असे कर्नल सारथ यांनी सांगितले.

स्मर्चचा पल्ला पिनाकापेक्षा जास्त आहे. स्मर्चद्वारे ९० किलोमीटरपर्यंतच्या लक्ष्यावर हल्ला करणे शक्य आहे. चार लाँचर्समधून ४० सेकंदात ४८ रॉकेट डागता येऊ शकतात. स्मर्चचे वैशिष्टय म्हणजे कुठल्याही प्रदेशात ही सिस्टिम नेता येऊ शकते. पिनाकाच्या अपग्रेडड व्हर्जनचं उत्पादन सुरु आहे.

भविष्यात पिनाकाद्वारे ७५ किलोमीटरपर्यंतच्या लक्ष्यावर प्रहार करता येऊ शकतो. चीनच्या कुठल्याही दादागिरीला त्याच भाषेत प्रत्युत्तर देण्यासाठी भारतीय लष्करही पूर्णपणे सज्ज आहे. उंचावरील या युद्ध क्षेत्रात भारताचा तोफखाना, एअर डिफेन्स गन्स, सैन्य तुकड्या तैनात आहेत. इथे तापमान मायनस म्हणजे उणे ३ ते ५ अंश सेल्सिअस आहे. भारताची ३,४८८ किलोमीटरची सीमारेषा चीनला लागून आहे.