सध्या भारतावर दहशतवादी हल्ल्याचं (Terrorist Attack) सावट आहे. सतत जम्मू-काश्मिरमध्ये हल्लेही घडताहेत. मात्र, असं असताना आज सीमा सुरक्षा दलानं (BSF) जैसलमेर सीमेजवळील (Jaisalmer Border) भागात एका संशयास्पद पक्ष्याला (Bird) पकडलं आहे.

आज (गुरुवार) ही घटना घडली असून या पक्ष्याला टॅग केलं असल्याचं स्पष्ट दिसून येत आहे. विशेष म्हणजे, पक्ष्याच्या उजव्या पायात एक अंगठी दिसते, ज्यावर काही संख्या आणि अक्षरं लिहिलेली आहेत. मात्र, बीएसएफनं या प्रकरणाचा तपशील अद्याप जारी केलेला नाहीय. या वर्षी जूनच्या सुरुवातीला एक स्थलांतरित पक्षी बारमेर आणि जैसलमेरला लागून असलेल्या आंतरराष्ट्रीय सीमा ओलांडून गेला होता.

गावकऱ्यांनी विष्णू की धानी गावाजवळ एशियाटिक हुबारा पक्षी पकडला आणि सीमा सुरक्षा दलाच्या (बीएसएफ) 87 बटालियनकडं सोपवला. त्या पक्ष्याच्या उजव्या पायात अॅल्युमिनियमच्या एका अंगठी व्यतिरिक्त दोन अंगठ्याही असल्याचं कळलं. डाव्या पायावर हिरवी प्लास्टिकची रिंग होती. रिंगांवर काही खुणा, कथित संख्या आढळल्या असून त्याच्या पंजामध्ये एक टॅग देखील आहे. त्यावर ‘संयुक्त अरब अमिराती’ (United Arab Emirates) असं लिहिलं आहे. हा पक्षी हेर होता की नाही याबाबतचा तपास सुरु आहे.