काँग्रेसचे ज्येष्ठ नेते व्ही हनुमंत राव यांनी (V Hanumantha Rao) तेलंगणाचे (Telangana) मुख्यमंत्री के चंद्रशेखर राव (K. Chandrasekhar Rao) यांना भारतीय संविधानाच्या (Indian Constitution) पुनर्लेखनाबाबत केलेलं विधान मागं घेण्याचं अल्टिमेटम दिलंय. एएनआय या वृत्तसंस्थेशी बोलताना काँग्रेस नेते म्हणाले, मुख्यमंत्र्यांनी दलित बंधू योजना सुरू केली आणि सरकार दलित कुटुंबाला 10 लाख देणार असल्याचं सांगितलं. मात्र, त्यांच्या या वादग्रस्त विधानामुळं दलितांमध्ये प्रचंड रोष पहायला मिळतोय.

हनुमंत राव पुढे म्हणाले, बाबासाहेबांनी (Babasaheb Ambedkar) संविधान लिहून दुर्बल घटकांचं कल्याण केलं. परंतु, एकीकडं केसीआर आंबेडकरांचा 124 फुटांचा पुतळा बनवायचं ध्येय बाळगतंय आणि दुसरीकडं त्यांना संविधान बदलायचंय. यापूर्वी त्यांनी 13 एप्रिल 2019 रोजी हैदराबादमधील (Hyderabad) पंजागुट्टा चौरास्ता येथे आंबेडकरांचा पुतळा (Ambedkar statue) बसवला होता.

संविधानाच्या कलम 3 मुळं आम्हाला तेलंगण मिळालं. संविधान बदलाची भाषा करुन केसीआर मोठी चूक करत आहेत. त्यांच्या वक्तव्यामुळं लोक प्रचंड संतापले आहेत. चंद्रशेखर राव यांनी त्यांचं विधान मागं घ्यावं, अन्यथा आम्हाला मोठं आंदोलन उभारावं लागेल, असा इशारा त्यांनी दिलाय. भारताच्या संविधानाचं पुनर्लेखन करण्याची वेळ आलीय. जगातील अनेक देशांनी आपल्या राज्यघटनेत बदल केले आहेत, त्याचप्रमाणं आपल्या देशातही तसं व्हायला हवं, असं चंद्रशेखर राव यांनी म्हंटलं होतं.