नवी दिल्ली: लसींच्या ( covieshield vaccine) दोन डोसमधील अंतर दुप्पट करण्याच्या निर्णयासंदर्भात नवीन धक्कादायक माहिती समोर आली आहे. अस्त्राझेनेकाने विकसित केलेल्या या कोरोना प्रतिबंधक लसींचे उत्पादन भारतात सीरम इन्स्टिट्यूट करत आहे. भारत सरकारने लसींच्या दोन डोसमधील अंतर (dosing gap)दुप्पट करण्याचा निर्णय घेतला. पण वैज्ञानिकांच्या सहमतीशिवाय हा निर्णय घेण्यात आला. सल्लागार समितीच्या तीन सदस्यांनी रॉयटर्सला ही माहिती दिली आहे. (indian scientists claim We didnt back doubling of vaccine dosing gap)

आरोग्य मंत्रालयाने १३ मे रोजी कोव्हिशिल्ड लसींच्या दोन डोसमधील अंतर ६ ते ८ आठवड्यांवरुन १२ ते १६ आठवडे करण्याचा निर्णय जाहीर केला. त्यावेळी देशात लसींचा तुटवडा होता. मागणी इतका लसींचा पुरवठा होत नव्हता आणि देशभरात कोरोना संसर्गाचे प्रमाणही जास्त होते.

NTAGI च्या १४ वैज्ञानिकांपैकी तिघांनी अशी शिफारस करण्यासाठी पुरेसे पुरावेच नसल्याचे सांगितले. नॅशनल इन्स्टिट्यूट ऑफ एपिडेमोलॉजीचे माजी संचालक एम.डी. गुप्ते म्हणाले की, "NTAGI दोन डोसमधील अंतर ८ ते १२ आठवड्यांनी वाढवण्याचे समर्थन केले. जागतिक आरोग्य संघटनेने सुद्धा दोन डोसमध्ये इतके अंतर ठेवण्याचा सल्ला दिला होता." पण १२ आठवड्यांनंतर लस दिल्यास त्याचे काय परिणाम होतील, याचा डाटा वैज्ञानिकांकडे उपलब्ध नसल्याचे त्यांनी सांगितले.

"आठ ते बारा आठवडे आम्ही मान्य केलं. पण १२ ते १६ आठवडे हे अंतर सरकारकडून आलं आहे. हे योग्य सुद्धा असेल किंवा नसेल सुद्धा. त्या बद्दल आमच्याकडे माहिती नाही" असे गुप्ते यांनी सांगितलं. NTAGI मधील गुप्तेंचे सहकारी मॅथ्यू वर्गीस यांनी सुद्धा सहमती दर्शवली. वैज्ञानिकांच्या गटाने आठ ते १२ आठवड्यांची शिफारस केली होती.

वैज्ञानिक पुराव्यांच्या आधारावर लसींच्या डोसमधील अंतरासंदर्भात निर्णय घेतला. NTAGI सदस्यांमध्ये कुठलेही मतभेद नाहीत असे आरोग्य मंत्रालयाने म्हटले आहे. कोविडवर काम करणाऱ्या NTAGI कडून आलेल्या शिफारशीवरुन आम्ही लसींच्या दोन डोसमध्ये १२ ते १६ आठड्याच्या अंतराचा प्रस्ताव स्वीकारत आहोत, असे आरोग्य मंत्रालयाने १३ मे रोजी म्हटले होते.