जोधपूर : अल्पवयीन मुलीवर बलात्कारप्रकरणी जोधपूरच्या तुरुंगात (Jodhapur jail) जन्मठेपेची शिक्षा भोगत असलेला स्वयंघोषीत आध्यात्मिक गुरु आसाराम बापू (Asaram Bapu) याला कोरोनाची लागण झाली आहे. त्यामुळे या आजारावर उत्तराखंडातील हरिद्वार (Haridwar) येथे आयुर्वेदिक उपचार घेण्यासाठी आपल्याला जामीन (Bail plea) मंजूर करण्यात यावा अशी मागणी आसारामने राजस्थान हायकोर्टाकडे (Rajastan Highcourt) एका याचिकेद्वारे केली आहे.(Infected with Covid19 jailed godman Asaram seeks bail for Ayurvedic treatment)

आसाराम सध्या कोविड पॉझिटिव्ह असून जोधपूरच्या एम्स रुग्णालयात त्याच्यावर उपचार सुरु आहेत. मात्र, आपल्याला यावर आयुर्वेदिक उपचार घ्यायची इच्छा असल्याचं त्यानं आपल्या याचिकेत म्हटलं आहे. आसारामला श्वास घेण्यास त्रास होत असल्याने गेल्या आठवड्यात बुधवारी मथुरादास मथूर रुग्णालयात उपचारांसाठी दाखल करण्यात आलं होतं. त्यानंतर त्याला शुक्रवारी एम्स रुग्णालयात हालवण्यात आलं. जोधपूर तुरुंगात असलेल्या इतर १२ कैद्यांसह आसारामलाही कोरोनाची लागण झाली होती.

१३ मे रोजी होणार सुनावणी

दरम्यान, आसारामच्या जामीन याचिकेवर १३ मे रोजी राजस्थान हायकोर्टात सुनावणी होणार आहे. आसारामचे वकील प्रदीप चौधरी यांनी सांगितलं की, सोमवारी कोर्टात एक याचिका दाखल करण्यात आली होती यामध्ये आसारामची शिक्षा रद्द करुन अंतरिम जामीन देण्यात यावा ही मागणी करण्यात आली. त्याचबरोबर आसाराम अनेक व्याधींनी ग्रस्त असून नुकत्याच त्याला कोविडचाही संसर्ग झाला आहे. यावर त्याला आयुर्वेदिक उपचार घ्यायचे आहेत, असंही चौधरी यांनी कोर्टाला सांगितलं.

२०१८ मध्ये झाली होती जन्मठेपेची शिक्षा

स्वयंघोषीत आध्यात्मिक गुरु आसारामला एससी/एसटी कोर्टानं १६ वर्षीय मुलीवर बलात्कार केल्याप्रकरणी सन २०१८मध्ये जन्मठेपेची शिक्षा सुनावली. सन २०१३मध्ये एका अल्पवयीन मुलीनं आसारामने आपल्यावर जोधपूर येथील मनई आश्रम येथे बलात्कार केल्याचा आरोप केला होता. याप्रकरणी गुन्हा दाखल झाल्यानंतर मध्य प्रदेशातील इंदूर येथून सन २०१४ मध्ये त्याला अटक झाली होती. आसारामवर पॉक्सो कायदा, जुवेनाईल जस्टिस अॅक्ट, बलात्कार, गुन्हेगारी कट या कलमांखाली गुन्हा दाखल झाला होता. त्यानंतर एप्रिल २०१८ मध्ये कोर्टानं दोषी ठरवत एक लाख रुपयांच्या दंडासह जन्मठेपेची शिक्षा सुनावली.