जम्मू आणि काश्मीरमधील अखनूर इथं भाविकांची एक बस खोल दरीत कोसळल्याची घटना घडली आहे. या दुर्घटनेत २१ जणांचा मृत्यू झाला असून ४० जण जखमी झाले आहेत. ही बस हरयाणातील भाविकांना घेऊन काश्मीरमध्ये गेल्याची प्राथमिक माहिती मिळते आहे.

काँग्रेसचे अध्यक्ष मल्लिकार्जुन खर्गे यांनी या अपघात प्रकरणी ट्विट करुन माहिती दिली आहे. त्यांनी म्हटलं की, जम्मू आणि काश्मीरच्या अखनूर इथं भयानक बस अपघाताचं वृत्त ऐकून अत्यंत दुःख झालं आहे. या अपघातात २१ जणांचा मृत्यू झाला आहे. तसेच अनेक जण जखमी झाले आहेत. या अपघातात मृत्यू पावलेल्या व्यक्तींच्या सहवेदना व्यक्त करतो.

माझी प्रशासनाला विनंती आहे की त्यांनी या अपघातग्रस्तांना तातडीनं वैद्यकीय मदत तसेच मृतांच्या नातेवाईकांना नुकसान भरपाई द्यावी. काँग्रेस कार्यकर्ते या अपघातग्रस्तांना शक्य ती मदत करतील. सध्याच्या घडीला आम्ही पीडितांच्या कुटुंबियांसोबत आहोत.