श्रीनगर : उत्तर काश्मीरमधील बांदीपोरामध्ये (Kashmir Bandipora) सुरक्षा दलांनी लष्कर-ए-तौयबाला (Lashkar-e-Taiba) जोरदार झटका दिलाय. लष्कराचं जाळं गुप्तपणे तयार करणारा कमांडर अबू हंजला (Abu Hanzala) याला सुरक्षा दलांनी अटक केलीय.

अबू हंजला जम्मू-काश्मीरमध्ये असलेला लष्करचा कमांडर बाबर भाईच्या सतत संपर्कात होता. त्याच्या मागावर लष्कराचे पोस्टर्स, जिहादी साहित्य आणि शस्त्रास्त्रांचा साठाही सापडला आहे. पोलिस, लष्कर आणि सुरक्षा यंत्रणा त्याची चौकशी करत आहेत. अबू हंजला हा बांदीपोर जिल्ह्यातील हाजीनचा रहिवासी आहे. त्याचं खरं नाव मेहराजुद्दीन राथर आहे.

पोलीस, लष्कर आणि सीआरपीएफच्या संयुक्त टास्क फोर्सनं चंदरगीर हाजीन इथं केलेल्या विशेष कारवाईदरम्यान त्याला अटक केली. संबंधित अधिकाऱ्यांनी सांगितलं की, चंदेरगीरमध्ये जेव्हा वाहनांमधील लोकांची तपासणी केली जात होती, तेव्हा हंजला घाबरला आणि त्यानं तेथून पळ काढण्याचा प्रयत्न केला. त्याला सैनिकांनी रोखलं आणि विचारपूस केली असता, तो एकाही प्रश्नाचं अचूक उत्तर देऊ शकला नाही.

घटनास्थळी त्याच्या सामानाची झडती घेतली असता, एक हँड ग्रेनेड आणि असॉल्ट रायफलची तीन काडतुसं सापडली. त्याचवेळी त्याला अटक करून पोलीस ठाण्यात नेण्यात आलं. चौकशीदरम्यान, अबू हंजला असल्याचं उघड झालं. जो काही काळापूर्वी बांदीपोरा येथील दहशतवादी (Terrorist) संघटनेत स्थानिक मुलांची भरती करण्यात गुंतला होता.