Jayant Choudhary Joined NDA : लोकसभा निवडणूकीत भाजपला पराभूत करण्यासाठी एकत्र आलेल्या विरोधकांच्या आघाडीला पुन्हा मोठा झटका बसला आहे. राष्ट्रीय लोक दल (रालोद) चे अध्यक्ष जयंत चौधरी यांनी इंडिया आघाडीतून बाहेर पडत त्यांचा पक्ष 'एनडीए'मध्ये सहभागी होत असल्याचे जाहीर केले आहे. राष्ट्रीय लोकदलाचे अध्यक्ष जयंत चौधरी यांनी एनडीएसोबत जाण्याचा निर्णय घेतल्याची घोषणा आज (सोमवारी) केली.

पक्षातील सर्व आमदारांशी चर्चा केल्यानंतर एनडीएत सहभागी होण्याचा निर्णय घेतला असल्याचे चौधरी म्हणाले.आमदारांच्या नाराजीवर बोलताना ते म्हणाले की आम्ही सर्व आमदारांशी चर्चा केली आहे. आमचे सर्व आमदार आमि कार्यकर्ते आमच्यासोबत आहेत. चौधरी चरण सिंह यांना भारतरत्न देऊन गौरवण्यात आले आहे. हे माझ्या कुटुंबासाठी आणि शेतकऱ्यांसाठी खूप मोठा सन्मान आहे, असेही जयंत चौधरी यावेळी म्हणाले.

पश्चिम यूपीमध्ये जाट, शेतकरी आणि मुस्लिम मतदारांची सख्या जास्त आहे. येथे लोकसभेच्या २७ जागा आहेत आणि २०१९ च्या निवडणूकीत भाजपने १९ जागांवर विजय मिळवला होता. तर ८ जागांवर विरोधी पक्षाच्या आघाडीला यश मिळाले होते. यामध्ये सपाचे ४ आणि बसपाचे ४ उमेदवार विजयी झाले होते. मात्र आरएलडीला एकाही जागेवर विजय मिळाला नव्हता. इतकेच नाही तर जाट समाजाचे देखील समर्थन त्यांना मिळाले नव्हते. २०१४ च्या निवडणूकीत देखील जयंत यांच्या पदरी निराशाच पडली होती, त्यांना तेव्हा देखील एकही जागा जिंकता आली नव्हती.