पंजाबच्या तरनतारण जिल्ह्यातील सरहाली पोलिस स्टेशनवर (Sarhali Police Station) 9 डिसेंबरच्या रात्री झालेल्या हल्ल्यामागं विदेशी दहशतवाद्यांचा हात असल्याचं समोर आलंय, असं पंजाब डीजीपी गौरव यादव (DGP Punjab Gaurav Yadav) यांनी सांगितलं.

लखबीर सिंग उर्फ लांडा, सतबीर सिंग उर्फ सत्ता आणि गुरदेव उर्फ जैसेल आणि अजमीत सिंग अशी आरोपींची नावं आहेत. सध्या ते तुरुंगात आहेत. रॉकेट प्रोपेल्ड ग्रेनेड (Rocket Propelled Grenades) हल्ल्याची योजना आखल्याप्रकरणी दोन अल्पवयीन मुलांसह सहा तरुणांना अटक करण्यात आलीय. सूत्रांनी दिलेल्या माहितीनुसार, लखबीर सिंग कॅनडामध्ये (Canada) असून सतबीर सत्ता आणि गुरदेव युरोपीय (Europe) देशांमध्ये वास्तव्यास आहेत. गुरदेव नुकताच दुबईतून युरोपमध्ये स्थलांतरित झाला आहे.

चोहला साहिब येथील गुरलाल सिंग उर्फ गहला (19), थथिया महंता गावातील सुरलालपाल सिंग उर्फ गुरलाल (21) आणि जोबनप्रीत सिंग उर्फ जोबान (18), गुरप्रीत सिंग उर्फ गोपी (18) रा. नौशेरा पन्नूआन अशी अटक केलेल्या आरोपींची नावं आहेत. याप्रकरणी अटक करण्यात आलेल्या दोन अल्पवयीनांनी पोलिस स्टेशनवर हल्ला केला होता.

सोव्हिएत काळातील कॅलिबर RPG-26 शस्त्र, जे अफगाणिस्तानात मुजाहिदीन वापरत होते. हे शस्त्र सीमेपलीकडून आणलं गेलं होतं. पोलिसांनी अटक केलेल्यांकडून तीन पिस्तुल, दारूगोळा, हातबॉम्ब आणि एक मोटारसायकल जप्त केलीय. तरनतारणचे वरिष्ठ पोलीस अधीक्षक गुरमीत सिंग चोहान म्हणाले, हा हल्ला गोपी नंबरदार आणि गुरलाल गहला यांनी घडवून आणला होता. हे दोघं लांडा आणि सत्ता यांच्या संपर्कात होते. दोघांना गुरुवारी सरहाली येथून 32 पिस्तुल व 15 जिवंत काडतुसांसह अटक करण्यात आली. दरम्यान, लांडा आणि सत्ताकडून 8.5 लाख रुपये, पिस्तूल आणि 200 जिवंत काडतुसं मिळाल्याचं पोलिसांनी सांगितलं.