भोपाळ- मध्य प्रदेशचे माजी मुख्यमंत्री कमलनाथ यांनी माजी कॅबिनेट मंत्री इमरती देवी यांचा आयटम असा उल्लेख करत त्यांची खिल्ली उडवली होती. यावरुन मोठा वाद निर्माण झाला आहे. मुख्यमंत्री शिवराजसिंह चौहान यांनीही या प्रकरणावरुन कमलनाथ यांच्यावर निशाणा साधलाय. प्रकरण तापत असल्याचं पाहून कमलनाथ यांनी यावर अजब स्पष्टीकरण दिलंय. 

मी जे म्हटलं, त्यात कोणालाही दुखावण्याचाही हेतू नव्हता. मला त्यांचं नाव लक्षात येत नव्हतं. मी हातातल्या कागदावरील यादी वाचत होतो. त्यावर आयटम नंबर.1, आयटम नंबर.2 असं लिहिण्यात आलं होतं. मग हा अपमान झाला का? शिवराज केवळ एक संधी शोधत आहेत, कमलनाथ कधीही कोणाचा अपमान करु शकत नाही, असं कमलनाथ म्हणाले आहेत. 

कमलनाथ हे डबरा येथील प्रचारसभेत बोलत होते. 'त्या कोण आहेत, मी त्यांचं नाव का घेऊ...तुम्ही मला सावध करायला हवं होतं...काय आयटम आहे, असं ते म्हणाले होते. कमलनाथ यांच्या वक्तव्यावर मुख्यमंत्री शिवराजसिंह चौहान यांनी तीव्र शब्दांत आक्षेप नोंदवला आणि या विरोधात दोन तास मौनव्रत धारण करणार असल्याचे सांगितले. 

ईडीकडून फारुख अब्दुल्ला यांची चौकशी; राजकीय हेतूने प्रभावित?

कमलनाथ यांचे वक्तव्य म्हणजे राज्यातील महिलांचा आणि दलित मुलींचा अपमान असल्याचे भाजपने म्हटलंय. मुख्यमंत्री शिवराजसिंह चौहान यांनी कमलनाथ यांच्यावर हल्लाबोल केला. एक महिला आणि दलित मुलीसाठी अपशब्द वापरणाऱ्या कमलनाथ यांचा धिक्कार आहे. कमलनाथ यांनी हे लक्षात ठेवायला हवे की, हा तो देश आहे जिथे द्रौपदीच्या अपमानामुळे महाभारत झाले होते. राज्यातील जनता त्यांना माफ करणार नाही, अशा शब्दांत चौहान यांनी कमलनाथ यांचा समाचार घेतला.

दरम्यान, इमरती देवी या डबरा विधानसभा मतदारसंघातून पोटनिवडणुकीसाठी उभ्या आहेत. गुरुवारी त्यांनी उमेदवारी अर्ज दाखल केला. इमरती देवी या ज्योतिरादित्य शिंदे यांच्या समर्थक आहेत. त्यांनी काँग्रेसचा त्याग करत भाजपत प्रवेश केला आहे. त्या आता भाजपच्या तिकीटावर निवडणूक लढवत आहेत. मध्य प्रदेशमध्ये 28 विधानसभा जागांसाठी 3 नोव्हेंबर रोजी मतदान होत आहे.