नवी दिल्ली- मध्य प्रदेश विधानसभा निवडणुकीमध्ये काँग्रेसचा पराभव झाला आहे. या पार्श्वभूमीवर माजी मुख्यमंत्री कमलनाथ आपल्या प्रदेशाध्यक्ष पदाचा राजीनामा देण्याच्या तयारीत असल्याची माहिती मिळत आहे. ३ डिसेंबर रोजी चार राज्यांच्या विधानसभा निवडणुकीचा निकाल लागला. त्यातील तेलंगणासोडून इतर ठिकाणी काँग्रेसला पराभव स्वीकारावा लागला आहे.

न्यूज एजेन्सी एएनआयनुसार, कमलनाथ यांनी मंगळवारी काँग्रेस पक्षश्रेष्ठी आणि काँग्रेस अध्यक्ष मल्लिकार्जुन खरगे यांची भेट घेतली होती. यावेळी कमलनाथ यांना नवा प्रदेशाध्यक्ष शोधण्याच्या सूचना देण्यात आल्याचं समजतंय. (Kamal Nath is likely set to step down as the Congress state president in Madhya Pradesh following defeat in the assembly elections)

कमलनाथ यांनी इंडिया आघाडीतील काही नेत्यांवर टीका केली होती. त्यामुळेही काँग्रेस पक्षश्रेष्ठी त्यांच्यावर नाराज असल्याची माहिती आहे. कमलनाथ यांनी समाजवादी पक्षाचे प्रमुख अखिलेश यादव आणि संयुक्त जनता दलाचे प्रमुख नितीश कुमार यांच्यावर जागा वाटपावरुन टीका केली होती.

मध्य प्रदेशमध्ये भाजप पुन्हा एकदा सत्तेत आली आहे. राज्यात विधानसभेच्या एकूण २३० जागा आहेत. त्यातील १६३ जागांवर विजय मिळवून भाजपने मोठे यश मिळवलं आहे. दुसरीकडे काँग्रेसला ६६ जागांवर समाधान मानावे लागले आहेत. मध्य प्रदेशात १७ नोव्हेंबरला मतदान पार पडले होते.

कमलनाथ यांनी पक्षाच्या कार्यकर्त्यांना प्रोत्साहित करण्याचा प्रयत्न केलाय. ते म्हणाले की, आणीबाणीनंतर १९७७ मध्ये लोकसभा निवडणुकीत काँग्रेसचा दारुण पराभव झाला. इंदिरा गांधी आणि संजय गांधी यांना देखील याचा फटका बसला होता. पण, तीन वर्षानंतर १९८० मध्ये काँग्रेसने पुन्हा मुसंडी मारली होती. संसदेत आपण ३०० पेक्षा जास्त जागा जिंकल्या होत्या. (Latest Marathi News)