भोपाळ - मध्य प्रदेशमध्ये बावीस आमदारांनी राजीनामा दिल्यानंतर अडचणीत आलेल्या मुख्यमंत्री कमलनाथ सरकारला उद्या (ता. १६) विधानसभेत बहुमत सिद्ध करण्याचे आदेश राज्यपाल लालजी टंडन यांनी दिले आहेत. उद्या राज्याचे अर्थसंकल्पी अधिवेशन सुरू होत असून, राज्यपालांच्या अभिभाषणानंतर विश्‍वासदर्शक ठराव मांडला जाणार आहे.

आता बातम्या ऐकण्यासाठी डाऊनलोड करा ई-सकाळचे ऍप

ज्योतिरादित्य शिंदे समर्थक बावीस आमदारांनीही राजीनामे दिल्याने काठावर बहुमत असलेले काँग्रेस सरकार अडचणीत आले. या बावीस आमदारांमध्ये सहा मंत्र्यांचाही समावेश आहे. मुख्यमंत्री कमलनाथ यांनी भाजपवर घोडेबाजार करत असल्याचा आरोप करत विश्‍वासदर्शक ठरावासाठी तयार असल्याचे आव्हान दिले होते. या पार्श्‍वभूमीवर, राज्यपालांनी काल रात्री मुख्यमंत्र्यांना पत्र पाठवत बहुमत सिद्ध करण्यास सांगितले.

संसर्गाचा एकत्रित मुकाबला करू; सार्क देशांच्या व्हीसीत पंतप्रधान मोदींचा निर्धार 

‘विश्‍वासदर्शक ठरावासाठी तयार आहोत असे तुम्ही (कमलनाथ) दिलेल्या पत्रामध्ये नमूद केले होते. भाजपनेही या परिस्थितीबाबत मला पत्र लिहीत राजीनामा दिलेल्या आमदारांवर राज्य सरकारकडून अनावश्‍यक दबाव टाकला जात असल्याची तक्रार करण्यात आली आहे. वरील माहिती पाहता, तुमच्या सरकारने विधानसभेत विश्‍वास गमावला असून, ते अल्पमतात आले असल्याचे प्राथमिकदृष्ट्या दिसून येत आहे. हा अत्यंत गंभीर मुद्दा असल्याने राज्यघटनेतील तरतुदीनुसार आणि लोकशाही मूल्यांच्या संरक्षणासाठी तुम्ही १६ मार्चला बहुमत चाचणीस सामोरे जाणे आवश्‍यक आहे,’ असे राज्यपालांनी पत्रात म्हटले आहे.  बावीस आमदारांनी विधानसभा अध्यक्षांकडे राजीनामा दिल्याचे आणि माध्यमांनाही तसे कळविल्याचे मला समजले आहे. त्यांनी मलाही स्वतंत्र पत्र पाठविले असून, विधानसभा अध्यक्षांसमोर समक्ष हजर राहात राजीनामा देण्यासाठी सुरक्षेची मागणी केली आहे.