कन्नड सुपरस्टार 'किच्चा' सुदीप (Kiccha Sudeep) कर्नाटक विधानसभा निवडणुकीत (Karnataka Assembly Election) उतरण्याची दाट शक्यता आहे.

भारतीय जनता पक्षाच्या (BJP) प्रचारासाठी तो मैदानात उतरू शकतो, असं बोललं जात आहे. मात्र, त्यानं अद्याप यावर कोणतीही प्रतिक्रिया दिलेली नाही. परंतु, गुरुवारी तो याबाबत घोषणा करु शकतो.

निवडणुकीपूर्वी राजकीय पक्षात बड्या कलाकारांचा प्रवेश ही काही नवीन गोष्ट नाहीये. 2021 च्या पश्चिम बंगाल विधानसभा निवडणुकीदरम्यान मोठ्या सिनेस्टार्सची फौज रिंगणात होती.

आज सुदीप आपल्या राजकीय भूमिकेबाबत मोठी घोषणा करू शकतो. तो भाजपमध्ये प्रवेश करून निवडणूक लढवणार की नाही हे अद्याप स्पष्ट झालेलं नाही. सूत्रांनी दिलेल्या माहितीनुसार, आज सुदीपच्या निवासस्थानी एक बैठक होणार आहे. यामध्ये तो निवडणूक लढवायची की फक्त प्रचार करायचा याविषयी पुढील नियोजनावर कुटुंबातील सदस्यांचं मत घेणार असल्याचं कळतंय.

निवडणुकीत सुदीप भाजपचा प्रचार करू शकतो आणि नंतर एमएलसी पदासाठी दावा करण्याची शक्यता आहे. सुदीपची मध्य कर्नाटकात आणि विशेषत: अनुसूचित जमातींमध्ये बरीच लोकप्रियता आहे. भाजपनं दक्षिण भारतीय राज्यातील उमेदवारांची नावं अद्याप जाहीर केलेली नाहीत.

मुख्यमंत्री बसवराज बोम्मई यांनी सांगितलं की, 8 एप्रिल रोजी भाजपच्या संसदीय मंडळाची बैठक होणार आहे. यामध्ये उमेदवारांची नावं निश्चित केली जातील. कर्नाटकात 10 मे रोजी मतदान होणार आहे. तर, 13 मे रोजी मतमोजणी होणार आहे.