कर्नाटकात विधानसभा निवडणुकीच्या (Karnataka Assembly Election) तोंडावर राजकीय पक्षांमध्ये धुसफूस सुरू झाली आहे. सत्ताधारी भारतीय जनता पक्षाला (BJP) गुरुवारी मोठा झटका बसला आहे.

इथं भाजपकडून चार वेळा विधान परिषदेचे सदस्य राहिलेले दिग्गज नेते पुत्तन्ना यांनी पदाचा आणि पक्षाचा राजीनामा देऊन काँग्रेसमध्ये प्रवेश केला.

पुत्तन्ना यांना एआयसीसीचे सरचिटणीस रणदीप सिंग सुरजेवाला (Randeep Singh Surjewala), एलओपी सिद्धरामय्या आणि कर्नाटक काँग्रेसचे अध्यक्ष डीके शिवकुमार (DK Shivakumar) यांनी काँग्रेसचं (Congress) सदस्यत्व दिलं. एक दिवसापूर्वी पुत्तन्ना यांनी वैयक्तिक कारणास्तव भाजपच्या एमएलसी आणि प्राथमिक सदस्यत्वाचा राजीनामा दिला होता.

पुत्तन्ना हे चार वेळा विधान परिषदेचे सदस्य राहिले आहेत. त्यांनी बेंगळुरू अर्बन, बेंगळुरू ग्रामीण आणि रामनगर जिल्ह्यांतील शिक्षक मतदारसंघाचं प्रतिनिधित्व केलंय. पुत्तन्ना यांची ऑक्टोबर 2020 मध्ये विधान परिषदेवर पुन्हा निवड झाली आणि त्यांचा कार्यकाळ ऑक्टोबर 2026 मध्ये संपणार होता.