Karnataka Election Result 2023 : कर्नाटक विधानसभेत २२४ आमदार निश्चित झाले आहेत. यात सर्वाधिक ९१ वयाचे आमदार शामनूर शिवशंकराप्पा (Shamanur Shivashankarappa) ठरले आहेत. एवढ्या वयातही त्यांनी दावणगेरे उत्तर मतदारसंघातून काँग्रेस पक्षाकडून निवडणूक लढविली. त्यांचा मुलगा मल्लिकार्जून यांनीही निवडणूक लढविली.

शामनूर हे लिंगायत समाजाचे (Lingayat Community) प्रभावी नेते आहेत. या वेळी त्यांना रोखण्यासाठी भाजपने कसरत केली; पण शामनूर यांना रोखणे शक्य झाले नाही. ते आता या निवडणुकीत विधानसभेत सर्वात जास्त वयाचे आमदार ठरले आहेत. विशेष म्हणजे, गेल्या विधानसभेतही शामनूर हेच सर्वात ज्येष्ठ आमदार होते.

नंजनगुड विधानसभा मतदारसंघातून २८ वर्षांच्या तरुणाने काँग्रेसकडून (Congress) विजयी होत सर्वात कमी वयाचे आमदार ठरले आहेत. दर्शन ध्रुवनारायण (Darshan Dhruvanarayan) यांनी विजय मिळवत सर्वात कमी वयाचे आमदार म्हणून विधानसभेत प्रवेश करणार आहेत. दर्शन यांचे वडील ध्रुवनारायण यांनी आपल्या मतदारसंघात तयारी करून काँग्रेसकडे उमेदवारीची मागणी केली होती.

दरम्यान, त्यांचे निधन झाल्याने काँग्रेसची उमेदवारी दर्शन यांना मिळाली. त्यातून दर्शन यांनी विजयी होत सर्वात कमी वयाचा आमदार होण्याचा मान मिळविला. वडिलांच्या निधनानंतर दर्शन यांची आई यांचेही महिन्यातच निधन झाले होते. त्यामुळे सहानुभूतीच्या आधारवर दर्शन यांचा विजय सोपा झाला.