बंगळूरू: काँग्रेस नेते व कर्नाटकचे माजी मुख्यमंत्री सिद्धारमय्या यांनी एका महिलेची ओढणी ओढल्याचा व्हिडिओ सोशल मीडियावर व्हायरल झाला आहे. व्हिडिओ व्हायरल झाल्यानंतर भाजपने काँग्रेसवर टीकेची झोड उठविली आहे.

म्हैसूरमधील एका सार्वजनिक कार्यक्रमादरम्यान हा प्रकार घडला आहे. सिद्धारामय्यां यांच्याकडे एक महिला तक्रार सांगत होती. परंतु, सिद्धारामय्यांनी दिलेल्या उत्तरावर महिलेचे समाधान होऊ शकले नाही. त्यामुळे ती वाद घालू लागली. सिद्धारामय्या महिलेला शांत बसण्यास सांगत होते. परंतु, महिला ऐकण्याच्या मनस्थितीत नव्हती. महिलेला शांत करण्याच्या प्रयत्नात सिद्धारामय्या यांच्याकडून तिची ओढणी ओढली गेली. संबंधित व्हिडिओ सोशल मीडियावर व्हायरल झाला आहे.

'सिद्धारामय्या यांनी ज्या प्रकारे संबंधित महिलेशी गैरवर्तन केले. त्यावरून त्यांचा महिलांकडे पाहण्याचा दृष्टीकोन दिसून आला. हा गुन्हा आहे. आता सिद्धारामय्या यांच्यावर काय कारवाई करणार याचे उत्तर काँग्रेस अध्यक्ष राहुल गांधी यांनी द्यावे,' असे भाजपचे नेते प्रकाश जावडेकर यांनी म्हटले आहे.

या प्रकारावर स्पष्टीकरण देताना काँग्रेस नेते दिनेश गुंडू राव म्हणाले, 'कधीकधी लोक टोकाचे प्रश्न विचारतात. त्यांचे म्हणणे ऐकून घेतल्यानंतरही ते शांत राहत नाहीत. त्यामुळे तुम्ही त्यांच्या हातातील माईक खेचण्याचा प्रयत्न करता. माईक खेचतानाच सदर महिलेची ओढणी खेचली गेली. त्या महिलेशी गैरवर्तन करण्याचा सिद्धारामय्या यांचा हेतू नव्हता.'