बंगळूर : मागील भाजप सरकारच्या (BJP Government) विरोधात आंदोलनादरम्यान तत्कालीन मुख्यमंत्र्यांच्या निवासस्थानाला घेराव घालण्याचा प्रयत्न केल्याप्रकरणी विद्यमान मुख्यमंत्री सिद्धरामय्या यांच्याविरोधातील खटल्याला उच्च न्यायालयाने (High Court) स्थगिती दिली आहे.

बेळगावचे कंत्राटदार संतोष पाटील आत्महत्या प्रकरणातील पहिले आरोपी भाजपनेते, माजी मंत्री ईश्वराप्पा यांची मंत्रिमंडळातून हकालपट्टी करावी यासाठी काँग्रेसने निदर्शने केली होती. त्यावेळी विरोधी पक्षनेते असलेल्या सिद्धरामय्या यांच्यासह काँग्रेसच्या नेत्यांनी बसवराज बोम्मई यांच्या निवासस्थानाला घेराव घालण्याचा प्रयत्न केला.

या संदर्भात काँग्रेस नेत्यांवर हायग्राऊंड पोलिस ठाण्यात गुन्हा दाखल करण्यात आला होता. रद्द करण्यासाठी सिद्धरामय्या यांनी उच्च न्यायालयात धाव घेतली होती. आता उच्च न्यायालयाने सिद्धरामय्या यांच्या विरोधात स्थगिती आदेश जारी केला आहे.

निरीक्षक झहिदा यांनी दाखल केलेल्या तक्रारीच्या आधारे गुन्हा दाखल केला होता. सिद्धरामय्या, कर्नाटक काँग्रेस प्रदेशाध्यक्ष डी. के. शिवकुमार, काँग्रेसचे प्रभारी रणदीपसिंग सुरजेवाला, एम. बी. पाटील, प्रियांक खर्गे, व्ही. एस. उग्राप्पा यांच्यासह एकूण ३६ नेत्यांविरोधात तक्रार दाखल केली होती.