एका २० वर्ष वय असलेल्या तरुणाने आयफोनसाठी एका डिलीव्हरी बॉयची कथितरीत्या हत्या करून चार दिवस मृतदेह स्वतःच्या घरात ठेवल्याचा धक्कादायक प्रकार समोर आला आहे.

या तरुणाने ऑनलाईन आयफोन ऑर्डर केला. यानंतर जेव्हा डिलीव्हरी एजंट हा ऑर्डर केलेला आयफोन देण्यासाठी घरी आला तेव्हा त्याने चक्क डिलीव्हरी एजंटचीच भोकसून हत्या केली. कर्नाटकातील हसन जिल्ह्यात हा हदरवून टाकणारा प्रकार घडला आहे.

मिळालेल्या माहितीनुसार, ११ फेब्रुवारी रोजी अंचकोप्पल रेल्वे स्थानकाजवळ एक जळालेला मृतदेह आढळून आल्याने ही बाब उघडकीस आली, त्यानंतर तपास सुरू करण्यात आला.

तपासादरम्यान असे निष्पन्न झाले की, हेमंत नाईक (२३) हा ई-कार्ट एक्स्प्रेसमध्ये काम करणारा तरुण ७ फेब्रुवारी रोजी लक्ष्मीपुरा ले-आऊटजवळ हेमंत दत्ता यांने बुक केलेला सेकंडहँड आयफोन देण्यासाठी गेला होता. डिलीव्हरी एजंटला देण्यासाठी पैसे नव्हते म्हणून त्याची कथितरीत्या हत्या केली. या प्रकारमुळे खळबळ उडाली आहे.

नाईक याने ऑर्डर डिलीव्हरीनंतर ४६ हजार रुपयांची मागणी केली असता हेमंतने वार करून त्याचा खून केला आणि मृतदेह चार दिवस स्वतःच्या घरीत ठेवला. नंतर तो मृतदेह पोत्यात भरून, दुचाकीवर नेऊन रेल्वे स्थानकाजवळ जाळून टाकला.

सीसीटीव्ही फुटेजमध्ये आरोपी मृतदेह जाळण्यासाठी दुचाकीवरून मृतदेह घेऊन जाताना दिसत आहे. पोलिसांनी दिलेल्या माहितीनुसार मृतदेह जाळून पुरावे नष्ट करण्यासाठी आरोपीने पेट्रोल देखील खरेदी केले होते. यानंतर पोलिसांनी सीसीटीव्ही फुटेज शोधून त्या व्यक्तीला अटक केली.