बंगळूर : दलितांसह सर्व समुदायांकडून मुख्यमंत्रीपद देण्याची मागणी आहे, परंतु काँग्रेस हायकमांडला (Congress High Command) यावर अंतिम निर्णय घ्यावा लागेल, असे सार्वजनिक बांधकाम मंत्री सतीश जारकीहोळी (Satish Jarkiholi) यांनी सोमवारी सांगितले. त्यांनी जातनिहाय जणगणना, आमदारांचा विदेश दौरा यासह विविध प्रश्नाना त्यांनी उत्तरे दिली.

ते म्हणाले, ‘‘२०१३ मध्येही दलित मुख्यमंत्र्यांची मागणी होती. हा मुद्दा वारंवार मांडला गेला आहे. २००८ मध्ये देखील मल्लिकार्जुन खर्गे यांनाही संधी मिळाली नाही. गृहमंत्री जी. परमेश्वर आठ वर्षे पक्षाचे काँग्रेसचे अध्यक्ष होते आणि उपमुख्यमंत्री झाले, पण त्यांनाही मुख्यमंत्री होण्याची संधी मिळाली नाही.’’

सरकारच्या अडीच वर्षानंतर असे होऊ शकते का, असे विचारले असता ते म्हणाले, ‘‘ते आमच्या हातात नाही. हायकमांड, मुख्यमंत्री, उपमुख्यमंत्री आणि पक्षाध्यक्षांचा त्यांच्या पातळीवर निर्णय घेतात. मी सांगू शकत नाही.’’ परमेश्वर यांच्या निवासस्थानी नुकत्याच झालेल्या बैठकीत मुख्यमंत्री सिद्धरामय्या, जारकीहोळी आणि मंत्री एच. सी. महादेवप्पा यांची उपस्थिती होती, अशी अफवा पसरली होती की, परमेश्वर मुख्यमंत्री होण्याच्या शर्यतीत असू शकतात.

मुख्यमंत्री बदलाबाबत काँग्रेसअंतर्गत दावे-प्रतिदावे होत असताना या बैठकीला महत्त्व प्राप्त झाले होते. सतीश जारकीहोळी यांनी मुख्यमंत्री व्हावे, या वाल्मिकी गुरुपिता स्वामी प्रसन्नानंद स्वामीजींच्या मागणीबाबत विचारलेल्या प्रश्नावर मंत्री म्हणाले, ‘‘स्वामीजी हे सुरुवातीपासूनच सांगत आहेत. तो जुना मुद्दा आहे, नवीन काही नाही. दलित, लिंगायत, वक्कलिग समाजाचा नेता मुख्यमंत्री व्हावा, अशी सर्व समाजाकडून मागणी आहे.

त्यात विशेष काही नाही. पक्ष आणि सरकारमधील काही घडामोडींवर नाराज असलेले जारकीहोळी यांनी ५० माजी आणि विद्यमान आमदारांसह दुबईच्या सहलीची योजना आखली होती. जी आता हायकमांडच्या हस्तक्षेपानंतर स्थगित केल्याचे सांगितले जात आहे.