बंगळूर : भिन्न विचारसरणीचे दोन पक्ष असलेल्या भाजप-धजद (BJP-JDS Alliance) यांच्यातील युतीला पक्षाअंतर्गत तीव्र विरोध होत आहे. काही आमदार उघडपणे विरोध करत आहेत, तर काही मतभेद नोंदवत आहेत. सुरुवातीच्या टप्प्यावर हे मतभेद निर्माण झाल्याने युतीबाबत संभ्रमाचे वातावरण निर्माण झाले आहे.

परिणामी, दोन्ही पक्षांमध्ये दरी निर्माण होण्याची शक्यता बळावली आहे. भाजप आणि धजद यांच्यातील युतीला भाजप आणि धजदच्या काही आमदारांचा विरोध होत आहे. धजदच्या आमदार करेम्मा नाईक यांनी या आघाडीला विरोध दर्शवला आहे.

या विरोधामागे भाजप नेत्यांशी स्थानिक मतभेद हे प्रमुख कारण आहे. स्थानिक भाजप नेत्यांशी भांडण झाल्याने युतीच्या निर्णयाने त्यांची कोंडी झाली आहे. याशिवाय नाईक यांच्या देवदुर्ग मतदारसंघातील अल्पसंख्याक समाजाच्या मतांचाही त्यांच्या विजयात महत्त्वाचा वाटा आहे.

एस. टी. सोमशेखरांचा विरोध

विशेषत: माजी मंत्री एस. टी. सोमशेखर यांनी या युतीला वैयक्तिक विरोध नोंदवला आहे. आपण मतदारसंघात धजदविरोधात राजकीय संघर्ष केला आहे. अशा परिस्थितीत दोन्ही पक्षांमधील युतीच्या विरोधात आहोत, असे ते म्हणाले. काँग्रेस आणि धजद आघाडीबाबतीत केवळ नेत्यांमध्ये मतभेद नव्हते. तळागाळातील कार्यकर्त्यांमध्ये तीव्र मतभेद होते. नेते एकत्र असले तरी कार्यकर्त्यांची एकजूट होणे कठीण आहे. आघाडीसाठी सर्वोच्च पातळीवरील नेत्यांनी सहमती दर्शवली आहे. मात्र तळागाळात पक्षहितासाठी एकमेकांबद्दल वैमनस्य वाटणारे कार्यकर्ते युतीला विरोध करत आहेत.

आमदार कंडकूरांचाही विरोध

धजदचे आणखी एक आमदार शरणगौडा कंडकूर यांनीही या आघाडीला विरोध दर्शवला आहे. मतदारसंघातील अस्तित्वाचा प्रश्न उपस्थित करत त्यांनी युतीला विरोध केला. मैदानात युती झाली की आपल्या राजकीय अस्तित्वाचा प्रश्न येतो. हा प्रश्न आम्हा सर्व नेत्यांना सतावत असल्याची नाराजी त्यांनी उघडपणे व्यक्त केली.