दिल्लीतील आम आदमी पक्षाच्या (Aam Aadmi Party) सरकारनं काश्मिरी पंडितांबाबत (Kashmiri Pandit) मोठी घोषणा केलीय. केजरीवाल सरकारनं (Kejriwal Government) म्हटलंय की, INA मार्केट येथील विस्थापित काश्मिरी पंडितांच्या दुकानांमध्ये मोफत वीज जोडणी उपलब्ध करून दिली जाईल. या संदर्भात उपमुख्यमंत्री मनीष सिसोदिया (Manish Sisodia) यांनी मंगळवारी बीएसईएस (BSES) आणि पीडब्ल्यूडीसह (PWD) संबंधित विभागांच्या उच्च अधिकाऱ्यांची बैठक घेतली.

मार्केटमध्ये पॉवर ट्रान्सफॉर्मर बसवण्यासाठी निवडलेल्या जागेची तात्काळ पाहणी करण्याचे निर्देश सिसोदिया यांनी अधिकाऱ्यांना दिले. यासोबतच एका महिन्याच्या आत सर्व काश्मिरी पंडितांच्या दुकानात मोफत वीज जोडणी देण्याच्या सूचना देण्यात आल्या आहेत. दिल्ली जल मंडळाचे उपाध्यक्ष आणि ग्रेटर कैलाशचे आमदार सौरभ भारद्वाज हेही या बैठकीला उपस्थित होते.

अलीकडेच काश्मिरी पंडितांच्या शिष्टमंडळानं मुख्यमंत्री अरविंद केजरीवाल (Arvind Kejriwal) यांची भेट घेऊन वीज कनेक्शनची समस्या सांगितल्याची माहिती आहे. काश्मिरी पंडितांनी सांगितलं की, त्यांची INA मार्केटमध्ये 100 हून अधिक दुकानं आहेत, जी विविध बांधकामांमुळं वर्षानुवर्षे स्थलांतरित करावी लागली. सध्या या दुकानांमध्ये विजेसाठी कायमस्वरूपी उपाययोजना नसल्यानं दुकानदारांना अडचणीचा सामना करावा लागत आहे. या प्रकरणाची दखल घेत मुख्यमंत्री अरविंद केजरीवाल यांनी तातडीनं कारवाई करण्याचे निर्देश विभागाला दिले.

उपमुख्यमंत्री मनीष सिसोदिया पुढं म्हणाले, मुख्यमंत्री अरविंद केजरीवाल यांच्या नेतृत्वाखालील दिल्ली सरकार नेहमीच काश्मिरी पंडितांच्या हितासाठी उभं आहे. काश्मिरी पंडितांवर राजकारण करण्याऐवजी त्यांच्या प्रगतीसाठी आणि उन्नतीसाठी आम्ही नेहमीच काम केलंय. काश्मिरी पंडितांच्या या समस्येची तातडीनं दखल घेण्यात आलीय. दिल्ली सरकारनं त्यांच्या INA दुकानांमध्ये वीज जोडणी लावण्याचे काम सुरू केले असून 1 महिन्याच्या आत येथील वीज कनेक्शन बसविण्याचे काम पूर्ण होईल. दुकानदारांकडून कोणतंही शुल्क घेतलं जाणार नाही. त्याचा संपूर्ण खर्च दिल्ली सरकार उचलणार आहे, असं त्यांनी शेवटी नमूद केलं.