सिलीगुडीतून एक धक्कादायक घटना समोर आलीये. इथं पतीवर पत्नीची हत्या करून मृतदेहाचे तुकडे केल्याचा आरोप आहे. ही घटना सिलीगुडीतील (Siliguri) फणसीदेवाच्या गोवलतुली भागातील आहे. रेणुका खातून असं मृत व्यक्तीचं नाव आहे.

मिळालेली अधिक माहिती अशी, पती मोहम्मद अन्सारुलनं विवाहबाह्य संबंधाच्या संशयावरून पत्नीची हत्या केलीये. यानंतर त्यानं रेणुका यांच्या मृतदेहाचे दोन तुकडे करून तीस्ता कालव्यात फेकून दिले. पोलिसांचं पथक गुरुवारी सकाळपासून रेणुका यांच्या मृतदेहाचा तीस्ता कालव्यात शोध घेत आहे.

आठवड्यापासून रेणुका होती बेपत्ता

पोलिसांनी (Siliguri Police) दिलेल्या माहितीनुसार, रेणुका ही सिलीगुडी परिसरातील कॉलेजच्या ब्युटी पार्लरमध्ये काम शिकण्यासाठी गेली होती. डिसेंबरच्या शेवटच्या आठवड्यापासून ती बेपत्ता होती. रेणुकाच्या कुटुंबीयांनी 24 डिसेंबरला सिलीगुडी पोलिस स्टेशनमध्ये बेपत्ता झाल्याची तक्रार दाखल केली होती. यानंतर पोलिसांनी तपास सुरू केला.

पत्नीला भोसकून मृतदेहाचे केले तुकडे

दरम्यान, अन्सारुलच्या चौकशीत खळबळजनक माहिती समोर आलीये. अन्सारुलनं 24 डिसेंबरला पत्नीची हत्या केल्याचं तपास अधिकाऱ्यांना समजले. यानंतर त्यानं मृतदेहाचे दोन तुकडे केले आणि छठला लागून असलेल्या तीस्ता कालव्यात फेकले. रेणुकाचा विवाह अन्सारुलशी 6 वर्षांपूर्वी झाला होता. तो दादाभाई कॉलनी, वॉर्ड क्रमांक 43, सिलीगुडी इथं राहत होता. दरम्यान, अटक करण्यात आलेल्या पतीला गुरुवारी सिलीगुडी न्यायालयात हजर करण्यात आलं. पोलिसांनी पतीकडं चौकशी केली असून या प्रकरणाची संपूर्ण माहिती गोळा करण्यात व्यस्त आहेत.

'आम्हाला सुरुवातीपासूनच अन्सारुलवर होता संशय'

पोलिसांनी सांगितलं की, आम्हाला सुरुवातीपासूनच अन्सारुलवर संशय होता. त्यानं परस्परविरोधी आणि दिशाभूल करणारी विधानं केली. अन्सारुलनं पोलिसांना सांगितलं की, 'मी रेणुकाला माझ्या मोटारसायकलवरून सुमारे 10 किमी अंतरावर असलेल्या फणसीदेवा इथं घेऊन गेलो. तिथं एका कालव्याजवळ पोहोचल्यावर, मी माझ्या पत्नीला भोसकून ठार केलं आणि तिच्या शरीराचे दोन तुकडे केले.' अधिकारी म्हणाले, "अन्सारुलनं डोके आणि धड दोन गोण्यांमध्ये टाकलं आणि कालव्याच्या पाण्यात फेकून दिले. गुरुवारी सकाळपासून सिलीगुडी पोलीस राज्य आपत्ती निवारण दलाच्या (SDRF) सहाय्यानं शरीराच्या अवयवांचा शोध घेत आहे. परंतु, अद्याप त्यांना फारसं यश मिळालं नाही, असं सिलीगुडीचे अतिरिक्त डीसीपी शुभेंद्र कुमार यांनी सांगितलं.