चंदीगड : कुलदीप बिश्नोई (Kuldeep Bishnoi) यांनी हरयाणाच्या आदमपूर मतदारसंघाच्या आमदारकीचा राजीनामा (Resigns MLA) दिला आहे. हरयाणा विधानसभा अध्यक्षांकडे त्यांनी राजीनामा सुपूर्द केला आहे. ते आज भारतीय जनता पक्षात प्रवेश करू शकतात. या जागेवर होणाऱ्या पोटनिवडणुकीत ते आपल्या मुलाला उभे करू शकतात, असे बोलले जात आहे.

कुलदीप बिश्नोई (Kuldeep Bishnoi) यांनी हिसार लोकसभा मतदारसंघातून स्वत:साठी भारतीय जनता पक्षाकडून (BJP) तिकीट मागितल्याचेही सूत्रांचे म्हणणे आहे. बिश्नोई यांनी चंदीगडमध्ये (Chandigarh) हरयाणा विधानसभा अध्यक्ष ग्यानचंद गुप्ता यांच्याकडे राजीनामा सुपूर्द केला आहे. त्यांच्या राजीनाम्यानंतर हिस्सार जिल्ह्यातील आदमपूर जागेवर पोटनिवडणूक घेण्याची वेळ आली आहे.

जूनमध्ये झालेल्या राज्यसभेच्या निवडणुकीत क्रॉस व्होटिंग झाल्यानंतर लगेचच बिश्नोई यांची काँग्रेसने सर्व पक्षीय पदांवरून हकालपट्टी केली होती. चार वेळा आमदार आणि दोन वेळा खासदार राहिलेले बिश्नोई हे पक्षावर आधीच नाराज होते.

या वर्षाच्या सुरुवातीला बिश्नोई यांनी हरयाणा प्रदेशाध्यक्षपदासाठी पक्षाकडून दुर्लक्ष केल्याने बंड पुकारला होता. कुलदीप बिश्नोई हे हरयाणाचे माजी मुख्यमंत्री भजन लाल यांचे धाकटा मुलगा आहे. यापूर्वीही त्यांनी काँग्रेस पक्ष सोडला होता.