मध्य प्रदेशातील (Madhya Pradesh) कुनो राष्ट्रीय उद्यानातून (Kuno National Park) देशासाठी सर्वात मोठी आणि आनंदाची बातमी समोर आलीये.

नामिबियातील 'सिया' या मादी चित्तानं (Namibian Cheetah) चार पिल्लांना जन्म दिलाय. मिळालेल्या माहितीनुसार, मादी चित्ता आणि चार लहान पिल्लं सध्या पूर्णपणे निरोगी आहेत. नवीन पाहुणे आणि मादी चिता यांची विशेष टीम काळजी घेत आहे.

चित्ता संवर्धन प्रकल्पाशी निगडित अधिकाऱ्यांनी नवीन पाहुण्यांच्या आगमनावर आनंद व्यक्त केलाय. त्यांनी सांगितलं की, 'कुनो नॅशनल पार्कमधील चित्ते त्यांच्या नवीन वातावरणाशी उत्तम प्रकारे जुळवून घेत असल्याचं सकारात्मक लक्षण आहे.'

72 व्या वाढदिवसानिमित्त PM मोदींनी मध्य प्रदेशातील कुनो नॅशनल पार्कमध्ये नामिबियातून आणलेले पाच नर आणि तीन मादी चित्त्यांचा समावेश असलेले आठ चित्ते सोडले होते. अलीकडंच एक मादी चित्ता 'साशा'चा संसर्गामुळं मृत्यू झाला.

दोन दिवसांपूर्वी 'साशा'चा मृत्यू

नामिबियातील साशा ही मादी चित्ता सोमवारी, 27 मार्च रोजी कुनो नॅशनल पार्कमध्ये मृतावस्थेत आढळून आली. मादी चित्ताची किडनी निकामी झाली होती. या बातमीनं देशात चित्त्यांचं पुनर्वसन करू इच्छिणाऱ्या वन्यजीवप्रेमींना धक्का बसला. मात्र, चार पिल्लं एकत्र जन्माला आल्यानंतर आता चित्त्यांच्या देशात पुन्हा स्थायिक होण्याच्या आशा पल्लवित होताना दिसत आहेत.

कुनोमधील चित्त्यांची संख्या वाढली

गेल्या वर्षी 17 सप्टेंबरला नामिबियातून आठ चित्ते आणून कुनो इथं सोडण्यात आले होते, तर 18 फेब्रुवारी रोजी दक्षिण आफ्रिकेतून 12 चित्त्यांची आणखी एक तुकडी भारतात आणण्यात आली होती. या 12 चित्त्यांमध्ये सात नर आणि पाच माद्या होत्या. या सर्व चित्त्यांसह सध्या कुनोमधील चित्त्यांची संख्या 23 झाली आहे.

1952 मध्ये देशात चित्ता नामशेष

भारतातील शेवटचा चित्ता 1947 मध्ये सध्याच्या छत्तीसगडमधील कोरिया जिल्ह्यात मरण पावला आणि 1952 मध्ये ही प्रजाती नामशेष झाल्याचं घोषित करण्यात आलं.