लखीमपूर खेरी प्रकरणातील (Lakhimpur Kheri Case) आरोपी आशिष मिश्राचा जामीन सुप्रीम कोर्टानं (Supreme Court) आज (सोमवार) फेटाळला असून आशिष मिश्राला आठवडाभरात कोर्टात हजर राहण्याचे आदेश दिलेत. यावर प्रतिक्रिया देताना भारतीय किसान युनियनचे राष्ट्रीय प्रवक्ते राकेश टिकैत (Rakesh Tikait) म्हणाले, आम्हाला सर्वोच्च न्यायालयाकडून न्यायाची अपेक्षा आहे. लखीमपूर खेरी घटनेवर सुप्रीम कोर्ट सुरुवातीपासूनच लक्ष ठेवून आहे. याबाबत कोर्टानं यूपी सरकारलाही फटकारलंय, असं त्यांनी नमूद केलं.

राकेश टिकैत पुढं म्हणाले, एसआयटीची जी टीम तयार केलीय, त्यांनी दिलेल्या अहवालाच्या आधारे काम करावं, असं आम्ही वारंवार सांगितलंय. उत्तर प्रदेश सरकारनं योग्य काम केलं नाही, म्हणूनच आशिष मिश्राला (Ashish Mishra) जामीन मिळाला. आज सुप्रीम कोर्टानं त्यावर सुनावणी केली असता, तो जामीन फेटाळण्यात आलाय. त्यानंतर आठवडाभरात पुन्हा कोर्टात हजर राहण्याचे निर्देश दिलेत. सर्वोच्च न्यायालयाकडून आम्हाला न्यायाची अपेक्षा आहे. ज्याप्रकारे सर्वोच्च न्यायालय सुरुवातीपासूनच याची दखल घेत आहे, त्यामुळं आम्हाला पूर्ण न्यायाची आशा आहे, असं त्यांनी सांगितलं.

आम्ही 25 तारखेला लखीमपूरला जाणार असून, तिथं लखीमपूरमध्ये एक समिती स्थापन करणार आहे. जी याकडं लक्ष देईल, असंही त्यांनी नमूद केलं. या प्रकरणात सुरुवातीपासूनच शेतकऱ्यांकडून आरोपींना संरक्षण देण्याचा आरोप होत आहे. कारण, या प्रकरणातील मुख्य आरोपी आशिष मिश्रा हा केंद्रीय गृह राज्यमंत्री अजय कुमार मिश्रा (Ajay Kumar Mishra) उर्फ ​​टेनी यांचा मुलगा आहे. हायकोर्टातून (High Court) त्याची जामिनावर सुटका झालीय. मात्र, सोमवारी सुप्रीम कोर्टानं निर्णय दिल्यामुळं आता शेतकऱ्यांना या प्रकरणात न्याय मिळण्याची आशा निर्माण झालीय.