लखनौ/प्रतापगड, ता. ११ : उत्तर प्रदेशात गेल्या चोवीस तासांत वीज पडून झालेल्या विविध दुर्घटनेत ३८ जणांचा मृत्यू झाला आहे. यात प्रतापगड येथे सर्वाधिक ११, सुलतानपूर येथे सात, चंदौली येथे सहा, मैनपुरी येथे पाच, प्रयागराज येथे चार, ओररिया, हाथरस, वाराणसी आणि सिद्धार्थनगर येथे प्रत्येकी एका जणांचा मृत्यू झाला आहे. तसेच दहा ते बारा जण जखमी झाले आहेत.

उत्तर प्रदेशात बुधवारी वीज कोसळून झालेल्या घटनांत किमान ३८ जणांचा मृत्यू झाला आहे. सध्या उत्तर प्रदेशातील अनेक भागात मुसळधार पाऊस पडत आहे. अनेक ठिकाणी पूरस्थिती असून जनजीवन ठप्प झाले आहे. प्रतापगड जिल्ह्यात विविध ठिकाणी वीज पडल्याने अकरा जणांचा मृत्यू झाला. तसेच चंदोली येथे वीज कोसळल्याने अनेक जण जखमी देखील झाले. त्यांच्यावर जिल्हा रुग्णालयात उपचार सुरू आहेत.

काल सायंकाळी चार ते सहा या काळात प्रचंड पाऊस झाला आणि वीज कोसळण्याच्या घटना घडल्या. त्यामुळे अनेक जण जखमी झाले. यादरम्यान दोन चुलत भाऊ शेतात काम करत असताना त्यांच्या अंगावर वीज कोसळली. यात दोघांचाही मृत्यू झाला. सुलतानपूर येथील सात मृतांत तीन मुलांचा समावेश आहे. वीज कोसळल्याच्या घटना घडल्या तेव्हा काही जण धानाची लागवड करत होते तर काही जण आंबे तोडत होते.

एक महिला पावसामुळे झाडाखाली उभी असता तिच्या अंगावर वीज पडली. तिचा जागेवरच मृत्यू झाला. ओररिया येथे पावसामुळे आंब्याच्या झाडाखाली थांबलेल्या एका चौदा वर्षाच्या मुलाचा वीजेमुळे मृत्यू झाला. देवरिया येथे शेतात जाणाऱ्या पाच वर्षाच्या मुलाचा वीज कोसळल्याने मृत्यू झाला. वाराणसीत दोन भावांवर वीज कोसळली. एकाचा जागीच मृत्यू झाला तर दुसऱ्यावर उपचार सुरू आहेत. भारतीय हवामान खात्याने येत्या पाच दिवसांत उत्तर प्रदेश आणि अन्य लगतच्या राज्यांत मुसळधार पावसाचा अंदाज वर्तविला आहे.