अथणी : आपण काँग्रेस (Congress) पक्ष सोडणार नाही, भाजपमध्ये जाणार नाही, हे स्पष्ट आहे. याशिवाय लोकसभेच्या निवडणुकीसाठी (Loksabha Election) रिंगणात उतरत नाही. काँग्रेसमध्ये योग्य महत्त्व असल्याने पक्ष सोडण्याचा प्रश्नच उद्‍भवत नाही. कोणी कितीही प्रयत्न केले तरी मी भाजपमध्ये (BJP) जाणार नाही, असे माजी उपमुख्यमंत्री आमदार लक्ष्मण सवदी (Laxman Savadi) यांनी सांगितले.

यंकची (ता. अथणी) येथे पत्रकारांशी ते बोलत होते. आमदार सवदी म्हणाले, कोण पक्ष सोडून कुठे गेले, त्याचा विचार न करता मी मात्र काँग्रेसमध्येच राहणार आहे. काँग्रेस पक्षामध्ये मला मानपान व स्थान आहे. यापूर्वी भाजप सोडून जात असताना नेत्यांनी माझा विचार केला नाही. आताच त्यांना का पुळका आला. कोणत्याही परिस्थितीमध्ये पक्ष सोडणार नसून मोडेन पण वाकणार नाही.

आपल्या तालुक्यातील पाणीपुरवठा योजना असलेल्या कोटलगी योजनेचा प्रारंभ गोकाकमध्ये का केला? असा प्रश्न उपस्थित करून ते म्हणाले, या कामाचा प्रारंभ कामाच्या ठिकाणी व्हायला हवा होता. माजी आमदारांच्या बोलण्यात कोणत्याही प्रकारचा अर्थ नाही. मुख्यमंत्री सिद्धरामय्या (CM Siddaramaiah), पाटबंधारे मंत्री डी. के. शिवकुमार यांनी अनुदान दिले असून त्यांच्या हस्ते लवकरच कामाचा प्रारंभ करण्यात येईल. काँग्रेस सरकारने अनुदान दिले असून त्यांच्या हस्तेच कामाचा प्रारंभ करून परिसरात पाण्याची गंगा वाहणार आहे.