लखनऊ : एलपीजी अर्थात घरगुती स्वंयपाकाच्या गॅस सिलेंडरसाठी नागरिकांनी रांगा लावलेल्या आपण पाहिल्या असतील. मात्र, आता हेच नागरिक आपल्या नातेवाईकाचा जीव वाचवण्यासाठी ऑक्सिजन सिलेंडर्ससाठी रांगा लावताना पहायला मिळत आहेत. देशात झालेल्या कोरोनाच्या उद्रेकामुळं ही भीषण परिस्थिती ओढवली आहे. उत्तर प्रदेशातील हे भयानक वास्तव छायाचित्रांच्या माध्यमातून समोर आलं आहे.

देशात कोरोनाचा उद्रेक झाला असून ज्या राज्यांना या कोरोनाच्या दुसऱ्या लाटेचा सर्वाधिक फटका बसला आहे. त्या राज्यांमध्ये ऑक्सिजनचा मोठा तुटवडा निर्माण झाला आहे. त्यामुळे कोरोनाबाधित रुग्णांच्या नातेवाईकांना ऑक्सिजन सिलेंडर्स भरुन घेण्यासाठी रांगा लावाव्या लागत आहेत. आपल्या पेशन्टसाठी रुग्णालयांमध्ये ऑक्सिजन उपलब्ध नसल्याने नातेवाईकांनी ऑक्सिजन भरुन देणाऱ्या मेडिकल ऑक्सिजन केंद्राबाहेर मोठे सिलेंडर्स घेऊन रांगा लावल्या आहेत.

दरम्यान, उत्तर प्रदेशातील रुग्णालये कोविडच्या रुग्णांनी भरुन गेली असून आता बेडही उपलब्ध नाहीत. त्यामुळे राजधानी लखनऊ शहरात बेडसाठी अनेक प्रयत्न करुनही तो मिळू न शकल्यानं ऑक्सिजन सिलेंडरसह रुग्णालयांचे उंबरे झिजवणाऱ्या एका ७० वर्षीय ज्येष्ठ व्यक्तीला नुकताच आपला जीव गमवावा लागला. अशाच प्रकारे अनेक रुग्ण सध्या ऑक्सिजनअभावी मृत्यूशी झुंज देत आहेत.

सरकारी आकडे कमी, मृतांची संख्या जास्त

देशात मध्य प्रदेश, उत्तर प्रदेश या राज्यांमध्ये कोरोनाचे सरकारी आकडे कमी दिसत असले तरी कोरोनामुळे मृत्यू झालेल्यांची संख्या लपून राहिलेली नाही. कारण या राज्यांमधील जवळपास सर्वच मोठ्या शहरांमधील प्रमुख स्मशानभूमींमध्ये मृतदेहांवर अंत्यसंस्कार करण्यासाठीही जागा उपलब्ध नसल्याचं नुकत्याच समोर आलेल्या छायाचित्रांवरुन दिसून आलं होतं.