उत्तर प्रदेश (Uttar Pradesh) विधानसभा आणि भारतीय जनता पक्षाच्या (BJP) लखनौमधील (Lucknow) कार्यालयासमोर एका महिलेनं आत्मदहन करण्याचा प्रयत्न केलाय. मुख्यमंत्री योगी आदित्यनाथ (Yogi Adityanath) भाजप कार्यालयात (BJP Office) पोहोचल्यानंतर, महिलेनं आत्मदहनाचा प्रयत्न केला. दरम्यान, घटनास्थळी उपस्थित असलेल्या पोलिसांनी महिलेला आत्मदहन करण्यापासून रोखलं असून पोलीस (Police) त्या महिलेची चौकशी करत आहेत.

राम प्यारी असं या महिलेचं नाव असून ती लखनौच्या रानीखेडामधील रहिवासी आहे. पोलीस आपल्या मुलाचा छळ करत असल्याचा आरोप या महिलेनं केलाय. महिलेनं सांगितलं की, माझा मुलगा निर्दोष आहे. मात्र, गोसाईगंज पोलीस (Gosaiganj Police) त्याला जबरदस्तीनं तुरुंगात पाठवत आहेत. सध्या महिलेला रुग्णालयात पाठवण्यात आलं असून प्राथमिक उपचारानंतर तिची चौकशी केली जाण्याची शक्यता आहे.

महिला भाजप कार्यालयाबाहेर पोहोचली, तेव्हा तिनं रॉकेल ओतून पेटवून घेण्याचा प्रयत्न केला. मात्र, तिला पाहताच पोलीस कर्मचाऱ्यांनी तात्काळ महिलेकडून राॅकेलचं कॅन काढून घेतलं आणि आत्मदहन करण्यापासून रोखलं. यादरम्यान महिला गोसाईगंज पोलिसांवर वारंवार आरोप करत होती. यासोबतच महिलेनं सीएम योगी यांच्याकडं न्यायाची मागणी केलीय. मुख्यमंत्री योगी आदित्यनाथ आत उपस्थित असताना महिलेनं भाजप कार्यालयाबाहेर रॉकेल ओतून आत्मदहन करण्याचा प्रयत्न केलाय. त्यामुळं संताप व्यक्त केला जात आहे.