Madhya Pradesh News: मध्य प्रदेशात मोहन यादव सरकार स्थापन होताच मोठे निर्णय घेण्यात येत आहेत. काल (बुधवार) मोहन यादव यांनी मुख्यमंत्री पदाची शपथ घेतली. त्यानंतर सार्वजनिक ठिकाणी लाऊड स्पीकरवर अनियंत्रित आवाजावर तसेच उघड्यावर मास विक्री करण्यावर बंदी घालण्यात आली. आज भाजप कार्यकर्त्याचा हात कापणाऱ्याच्या घरावर यादव सरकारने बुलडोझर चालवला.

भाजप कार्यकर्त्याचा हात कापणारा आरोपी फारुख राइन उर्फ ​​मिन्नी याच्या घरावर प्रशासनाने बुलडोझर चालवण्याचे आदेश दिले. भोपाळ येथील जनता कॉलनी क्रमांक 11 येथील आरोपीच्या घरावर बुलडोझर चालवण्यात आला. आरोपी फारुख राइनवर भाजप कार्यकर्ता देवेंद्र ठाकूर याचा हात कापल्याचा आरोप होता.

मध्य प्रदेश विधानसभेचे निकाल जाहीर झाल्यानंतर ५ डिसेंबरला फारुखने भाजप कार्यकर्ता देवेंद्र ठाकूर याच्यावर जीवघेणा हल्ला केला होता. यामध्ये देवेंद्र याचा हात कापला गेला होता. देवेंद्रला गंभीर परिस्थीत रुग्णालयात दाखल करण्यात आले.  कैलाश विजयवर्गीय यांनी रुग्णालयात जाऊन देवेंद्र ठाकूर याची भेट घेतली होती.

आरोपी फारुखचा हबीबगंज पोलिसांच्या गुंडा यादीत समावेश असून त्याच्यावर यापूर्वीही अनेक गुन्हे दाखल आहेत. या प्रकरणी पोलिसांनी फारुख राइन, अस्लम, शाहरुख, बिलाल आणि समीर या पाच आरोपींना यापूर्वीच अटक केली आहे. (Latest Marathi News)