नवी दिल्ली - ‘‘महादेव बेटिंग ॲपच्या प्रवर्तकांनी आतापर्यंत छत्तीसगडचे मुख्यमंत्री भूपेश बघेल यांनी ५०८ कोटी रुपये दिले आहेत, असा जबाब रोख रक्कम पोचविणाऱ्या ‘कुरिअर कंपनीने’ दिला आहे. ही तपास करण्यासारखी बाब आहे,’’ असे सक्तवसुली संचालनालयाने (ईडी) आज म्हटले आहे.

छत्तीसगडमधील निवडणुकीसाठी महादेव ॲपच्या प्रवर्तकांकडून पैसे पाठविले जात असल्याची माहिती ‘ईडी’ला मिळाली होती. त्या माहितीच्या आधारे कारवाई करत ‘ईडी’च्या अधिकाऱ्यांनी असीम दास याला अटक केली. त्याच्याकडून ५.३९ कोटी रुपये जप्त करण्यात आले आहेत. हे पैसे छत्तीसगडमधील एका राजकीय नेत्याला निवडणुकीसाठी देण्यात येणार होते, असे त्याने चौकशी दरम्यान सांगितल्याचा ‘ईडी’चा दावा आहे.

ईडीने प्रसिद्धीस दिलेल्या पत्रकात म्हटले आहे, ‘‘असीम दास याच्या चौकशीतून तसेच त्याच्या फोनच्या न्यायवैद्यक चाचणीतून तसेच या प्रकरणातील आणखी एक प्रमुख आरोपी शुभम सोनी याने त्याला पाठविलेल्या ईमेलमधून पैशांच्या व्यवहाराची माहिती मिळाली आहे. यापूर्वीही नियमितपणे पैसे पोचविण्यात आले होते आणि आतापर्यंत ५०८कोटी रुपये महादेव ॲपच्या प्रवर्तकांनी छत्तीसगडचे मुख्यमंत्री भूपेश बघेल यांना दिले आहेत, अशी माहिती पुढे आली आहे.’’

या सर्व गोष्टींची तपासणी करण्याची गरज आहे, असेही ‘ईडी’ने म्हटले आहे. ‘ईडी’च्या माहितीनुसार त्यांनी हॉटेल ट्रायडन आणि भिलाईमधील अन्य एका ठिकाणी तपासणी करण्यात आली आणि रोख पैसे घेऊन जाणारे कुरिअर पकडण्यात आले. हे घेऊन जाणाऱ्या असीम दासच्या घरातूनही काही रक्कम जप्त करण्यात आली.

पैशांच्या व्यवहारासाठी दासला संयुक्त अरब अमिरातीमध्येही पाठविण्यात आल्याची माहितीही चौकशीत मिळाली आहे. महादेव ॲपचे प्रवर्तक संयुक्त अरब अमिरातीमध्ये आहेत. ‘‘ही रक्कम छत्तीसगडमधील राजकीय नेते ‘बघेल’ यांना द्यायची होती,’ असे दासने मान्य केल्याचेही ‘ईडी’ने म्हटले आहे.

सट्टेबाजीशी संबंधित या ‘ॲप’शी संबंधित काही बेनामी खात्यांचीही माहिती मिळाली आहे. त्यातील १५.५९ कोटी रुपयांची रक्कमही जप्त करण्यात आली आहे. छत्तीसगडमध्ये सात नोव्हेंबर रोजी पहिल्या टप्प्यातील मतदान होणार आहे. त्यातील चार दिवस आधीच बघेल यांच्यावर आरोप करण्यात आले आहेत.