नवी दिल्ली Corona Update- काही दिवसांपासून कोरोनाबाधित रुग्णांची संख्या 50 हजारांच्या आत नोंदली जात आहे. रुग्णसंख्येत चढ-उतार पाहायला मिळतीये. गेल्या 24 तासांत देशात 39 हजार 070 नवे कोरोनाबाधित रुग्ण आढळून आले आहेत, तर दिवसभरात 43 हजार 910 रुग्णांनी कोरोनावर मात केली असून त्यांना डिस्चार्ज देण्यात आला आहे. शनिवारी देशात 491 रुग्णांचा मृत्यू झाला आहे. आरोग्य मंत्रालयाने यासंदर्भातील माहिती दिली. (india corona update)

आतापर्यंत देशात 3 कोटी 19 लाख 34 हजार 455 रुग्णांची नोंद करण्यात आली आहे, तर आतापर्यंत एकूण 3 कोटी 10 लाख 99 हजार 771 जणांनी कोरोनावर मात केली आहे. देशात सध्या कोरोनाचे 4 लाख 06 हजार 822 सक्रिय रुग्ण आहेत. देशातील कोरोनाबाधित मृतांची संख्या 4 लाख 27 हजार 862 एवढी झाली आहे. काही राज्यात कोरोना रुग्णांची संख्या जास्त नोंदली जात आहे. त्यात प्रामुख्याने केरळ राज्याचा समावेश आहे.

कोरोनावर मात करण्यासाठी देशात 16 जानेवारीपासून लसीकरणाला सुरुवात करण्यात आली. भारत सरकारने आतापर्यंत 50 कोटींपेक्षा अधिक नागरिकांना कोरोना प्रतिबंधक लस दिली आहे. शनिवारी देशात 55 लाख 91 हजार 657 लोकांनी कोरोना प्रतिबंधक लस घेतली. आतापर्यंत 50 कोटी 68 लाख 10 हजार 492 लोकांनी कोरोना प्रतिबंधक लशीचा किमान एक डोस घेतला आहे.

महाराष्ट्रातील कोरोना आकडेवारी

राज्यात दिवसभरात 6 हजार 061 नव्या रुग्णांची नोंद झाली आहे. 128 लोकांचा गेल्या 24 तासांत कोरोनामुळे मृत्यू झालाय. राज्यात आतापर्यंत 63 लाख 47 हजार 820 कोरोना रुग्णांची नोंद झालीये, तर 61 लाख 39 हजार 493 रुग्णांनी विषाणूवर मात केलीय. राज्यातील सक्रिय रुग्णांपैकी (active patient) 32 हजार 250 रुग्ण वेगवेगळ्या रुग्णालयात दाखल आहेत. त्यापैकी 13.72% रुग्ण गंभीर आहेत. पुण्यासह ठाणे शहरात सक्रिय रुग्णांची संख्या अधिक आहे. राज्यात 7 ऑगस्ट पर्यंत 74,995 सक्रिय रुग्णांची नोंद झाली.