नवी दिल्ली - संसदेत प्रश्न विचारण्यासाठी पैसे घेतल्याच्या आरोपाचा सामना करणाऱ्या तृणमूल काँग्रेसच्या खासदार महुआ मोईत्रा यांना लोकसभेच्या शिस्तपालन समितीसमोर येत्या २ नोव्हेंबरला हजर राहावे लागणार आहे. दरम्यान, व्यावसायिक दर्शन हिरानंदानी यांना लोकसभेच्या संकेतस्थळाचे लॉगिन आयडी आणि पासवर्ड दिल्याचे आज महुआ मोईत्रा यांनी मान्य केले.

भाजपचे खासदार निशिकांत दुबे यांनी खासदार मोईत्रा यांच्यावर पैसे घेतल्याचे आरोप केले आहेत. अदानीसंदर्भात प्रश्न विचारण्यासाठी खासदार मोईत्रा यांनी पैसे तसेच मौल्यवान भेटवस्तू घेतल्याचा आरोप त्यांनी केला आहे. तसेच मुंबईतील बांधकाम व्यावसायिक हिरानंदानी यांनी मोईत्रा यांचे लोकसभेचे लॉगिनचा वापर करत लोकसभा सचिवालयाकडे प्रश्न पाठविल्याचा आरोप केला आहे. या प्रकरणात आतापर्यंत खासदार निशिकांत दुबे व बांधकाम व्यावसायिक हिरानंदानी यांचे जवाब नोंदविण्यात आले आहेत.

मोईत्रा यांनी चार नोव्हेंबरला हजर होण्याची विनंती केली होती. परंतु खासदार विनोद सोनकर अध्यक्ष असलेल्या समितीने मोईत्रा यांची ही विनंती अमान्य करीत दोन नोव्हेंबरला समितीसमोर आपला जवाब नोंदवावा, असे निर्देश दिले आहेत.

लॉगिन दिल्याचे मान्य

मोईत्रा यांनी आज हिरानंदानी यांना लॉगिन पासवर्ड दिल्याचे मान्य केले. त्या म्हणाल्या, ‘‘दर्शन हिरानंदानी यांच्या कार्यालयातील एक व्यक्ती प्रश्‍न टाइप करायचा आणि तो आपण लोकसभेच्या संकेतस्थळावर टाकत होतो. प्रश्‍न टाइप केल्यानंतर त्यांचा फोन यायचा.

आपण मतदारसंघात सतत व्यग्र असल्याने हे प्रश्‍न मी एकदाच वाचायचे. हा प्रश्‍न टाइप केल्यानंतर मला मोबाईलवर ओटीपी यायचा आणि मी त्यांना ओटीपी द्यायचे. त्यानंतर प्रश्‍न दाखल व्हायचा. ’’ दर्शन हिरानंदानी हे लोकसभेचे लॉग इन आणि पासवर्ड वापरायचे व स्वत:च प्रश्‍न अपलोड करायचे, असा आरोप करणे हास्यास्पद असल्याचे त्या म्हणाल्या.